Հոկտեմբերի 27-ին կներկայացվեն «Հաքաթոն Երևան 2011» մրցույթի պայմանները

26 հոկտեմբերի 2011 - 10:51 AMT

PanARMENIAN.Net - Հոկտեմբերի 27-ի երեկոյան Մայքրոսոֆթ ինովացիոն կենտրոնում կայանալու է հանդիպում նվիրված դեկտեմբերին կայանալիք «Հաքաթոն Երևան 2011» մրցույթ-միջոցառմանը։ Հանդիպման ընթացքում ներկայացվելու են մրցույթի պայմանները։ Հանդիպումը կազմակերպել է Հանրային լրագրության ակումբը ՄԻԿ-ի հետ համատեղ։

Նմանատիպ հանդիպումներ արդեն կայացել են Երևանի պետական համալսարանում, Երիտասարդ առաջնորդների դպրոցում։

«Հաքաթոն Երևան 2011-ը» կայանալու է դեկտեմների 17-ին Երևանի քաղաքապետարանում։

Հաքաթոները Սիլիկոնե հովտում ծնունդ առած` ծրագրավորման և նախագծերի լայնածավալ միջոցառում են`ուղղված համատեղ ուժերով և նոր տեխնոլոգիաների միջոցով առաջադրված խնդիրների լուծմանը: Դրանց ընթացքում հավաքվում են ծրագրավորողներ, նախագծողներ և մի քանի ժամում ստեղծում, նախագծում և կյանքի են կոչում մի շարք ծրագրեր, նորարար լուծումներ։ Հաքաթոնը տեխնիկական տերմին է, գալիս է մարաթոն և անգլերեն hacking բառերից։ Hacking տեխնիկական իմաստով նշանակում է լավ տիրապետել և բարելավել։

Երևանի քաղաքապետարանը նախընտրում է հաքաթոնի արդյունքում տեսնել մոբայլ լուծումներ, ծրագրեր և այլ նախագծեր տրասնպորտային համակարգի, աղբահանության, զբոսաշրջության, նշանների տեղադրման, քաղաք-քաղաքացի կապի բարելավում, լրագրողական համայնքի համար քաղաքային խնդիրների գրագետ լուսաբանման համար ռեսուրսների մշակում և այլ թեմաներով։

Հայտերի ընդունման վերջնաժամկետն է հոկտեմբերի 30-ը:

Միջոցառման աջակիցներն են` Երևանի քաղաքապետարանը, Մայքրոսոֆթը, «Քաունթերփարթ ինթերնեյշնլի» հայաստանյան ներկայացուցչությունը, Ձեռնարկությունների ինկուբատոր հիմնադրամը, հեռահաղորդակցության և տեղեկատվական տեխնոլոգիաների առաջատար ընկերություններ, լրագրողական կազմակերպություններ: Ինֆորմացիոն հովանավորն է PanARMENIAN.Net ը:

Հղումներ թեմայով.

http://www.micarmenia.am/arm