Սանկիլ Ջոնսը հաստատեց «Եվրատեսիլ 2012»-ին Հայաստանը ներկայացնելու ցանկությունը

17 փետրվարի 2012 - 22:09 AMT

PanARMENIAN.Net - Ավստրիացի երգիչ Սանկիլ Ջոնսը հասատել է «Եվրատեսիլ 2012»-ին Հայաստանը ներկայացնելու ցանկության մասին լուրը:

escdaily.com-ին տված հարցազրույցում նա ասել է. «Երկար ժամանակ թվում էր, թե Հայաստանն այս տարի չի մասնակցի մրցույթին: Ես մտածում էի, որ ինչ-որ բացթողում կլինի, եթե Արարատ լեռան երկիրը չմասնակցի այդտեղ: Մենք ոգևորվեցինք Հայաստանի հեռուստաընկերության որոշումով և որոշեցինք FIRE երգով ներկայանալ «Եվրատեսիլին»: Ժամանակն է, որ Հայաստանը ոսկե մեդալ բերի այդ մրցույթից»:

Նա նաև նշել է, որ եթե Հայաստանի հանրային հեռուստաընկերությունը ընտրի իրեն, նա ամեն ինչ կանի, որ հաղթի:

Սանկիլ Ջոնսը մեծացել է ԱՄՆ-ում: Նրա հայրը լիբանանցի նկարիչ է, մայրը` ավստրիացի բալետի պարուհի: 5 տարեկանից երգել է եկեղեցական երգչախմբում, ինչպես նաև զբաղվել արևելյան և աֆրիկյան պարերով: Համերգներ է ունեցել Եվրոպայի մի շարք երկրներում:

Ադրբեջանական Էլլա և Նիկկի դուետը 2011թ-ի մայիսի 15-ին դարձավ Եվրատեսիլի հաղթող: Երկրորդ տեղը գրավեց իտալացի մասնակից Ռաֆայել Գուալազզին Madness Of Love երգով, իսկ երրորդ տեղում է Էրիկ Սաադը Շվեդիայից Popular երգով:

Մայիսի 10-ին Դյուսելդորֆում կայացավ «Եվրատեսիլ 2011» մրցույթի առաջին կիսաեզրափակիչը: Էմմին հանդես եկավ 4-րդ համարի տակ և մրցույթում ներկայացրեց «Boom-Boom» երգը և չանցավ եզրափակիչ փուլ:

Հայաստանը մի քանի ամիս որոշում էր, մասնակցե՞լ Բաքվում կայանալիք մրցույթին, թե ոչ: Հանրային հեռուստաընկերությունը Բաքվից և Եվրոպական հեռարձակողների միությունից (EBU) անվտանգության լուրջ երաշխիքներ էր պահանջում:

Հունվարի 17-ին EBU-ն մրցույթի պաշտոնական կայքում տեղադրեց մրցույթի մասնակից երկրների ցանկը, որտեղ նշված է նաև Հայաստանի անունը: Հայաստանի պատվիրակության ղեկավար Գոհար Գասպարյանը Հայաստանը Եվրոպական հեռարձակողների միության լիիրավ անդամ է և Բաքվում կայանալիք մրցույթին մասնակցելը դրա ապացույցն է:

«Եվրատեսիլ 2012»-ի կիսաեզրափակիչ փուլերը կայանալու են մայիսի 22-ին և 24-ին, եզրափակիչը` մայիսի 26-ին: Հայաստանը ելույթ է ունենալու երկրորդ կիսաեզրափակիչում`Սերբիայի, Շվեդիայի, Վրաստանի, Նիդեռլանդների, Պորտուգալիայի, Սլովենիայի, Մակեդոնիայի, Էստոնիայի, Բելառուսի, Թուրքիայի, Մալթայի, Սլովակիայի, Խորվաթիայի, Նորվեգիայի, Ուկրաինայի, Հայաստանի, Լիտվայի, Բուլղարիայի, Բոսնիա և Հերցեգովինայի հետ: