Հայաստանի ֆուտբոլի հավաքականը FIFA վարկանիշային աղյուսակում բարձրացել է 4 հորիզոնականով

Հուլիսի 8-15-ը տեղի ունեցած գլխավոր մարզական իրադարձությունների տեսությունը

Ֆուտբոլ. Հուլիսի 14-ին FIFA-ն հրապարակել է ազգային հավաքականների հերթական վարկանիշային աղյուսակը: Հայաստանի հավաքականը նախորդ աղյուսակի համեմատ բարձրացել է 4 հորիզոնականով և 318 միավորով զբաղեցնում է 96-րդ տեղը: Առաջին տեղում 1883 միավորով 2010-ի աշխարհի չեմպիոն Իսպանիայի հավաքականն է: Երկրորդ տեղում աշխարհի արծաթե մեդալակիր Հոլանդիայի հավաքականն է (1659 միավոր), երրորդ տեղում` Բրազիլիայի հավաքականը (1536): Հայտնի են դարձել ֆուտբոլի Հայաստանի և Վրաստանի երիտասարդական հավաքականների միջև խաղերի ամսաթվերը, որոնք կկայանան 2011թ. Եվրոպայի առաջնության ընտրական մրցաշարի շրջանակներում:

PanARMENIAN.Net - Առաջին խաղը տեղի կունենա Վազգեն Սարգսյանի անվան հանրապետական մարզադաշտում օգոստոսի 11-ին, պատասխան խաղը` սետպեմբերի 7-ին Թբիլիսիում: Խաղը տեղի կունենա Միխեյիլ Մեսխիի անվան մարզադաշտում: Հավաքականները հանդես են գալիս Եվրո-2011 ընտրական մրցաշարի 2-րդ խմբում: Հայաստանի հավաքականը 10 միավորով զբաղեցնում է 4-րդ տեղը, իսկ Վրաստանի հավաքականը մեկ միավոր պակաս ունի և 5-րդ տեղում է:

Հուլիսի 8-ին «Բանանցը» Եվրոպայի լիգայի 2010-11թ. խաղաշրջանի առաջին որակավորման փուլում Վազգեն Սարգսյանի անվան հանրապետական մարզադաշտում խաղաց Կիպրոսի «Անորտոսիսի» հետ: Առաջին խաղում, որը տեղի ունեցավ Կիպրոսում, հայկական թիմը զիջեց 0:3 հաշվով: Երևանում Ստեվիցա Կուզմանոսկու սաները մեկ գոլ բաց թողեցին, սակայն իրենք այդպես էլ չկարողացան գոլ խփել, թեև գոլային պահեր եղան: Երկու խաղերի արդյունքում «Բանանցը» զիջեց մրցակցին 0:4 հաշվով և հետագայում դուրս մնաց Եվրոպայի լիգայի հետագա պայքարից:

Նույն օրը «Ուլիսը» Թել Ավիվում հանդիպեց «Բնեյ Եհուդայի» հետ: Խաղն ավարտվեց 1;0 հաշվով իսրայելյան թիմի օգտին: Իսկ այդ թիմերի առաջին խաղը Երևանում ավարտվեց 0:0 հաշվով: Այսպիսով, «Ուլիսը» ևս դուրս մնաց հետագա պայքարից: 2009-ի Հայաստանի չեմպիոն «Փյունիկը» Բելգրադում Չեմպիոնների լիգայի երկրորդ որակավորման փուլում հանդիպել է «Պարտիզանի» հետ: Առաջինը խաղի հաշիվը բացեցին «Պարտիզանի» ֆուտբոլիստները: «Փյունիկը» շատ արագ հակագրոհ կազմակերպեց և պաշտպան Արտակ Եդիգարյանը գոլ խփեց: «Պարտիզանը» երկրորդ գոլը խփեց առաջին խաղակեսի ավելացված րոպեին: «Փյունիկի» դարպասապահ Արթուր Լեսկոյի սխալից հետո հաշիվը դարձավ 2:1: Վերջին գոլը 59-րդ րոպեին խփեց Կլերը: Խաղն ավարտվեց 3:1 հաշվով «Պարտիզանի» օգտին: «Փյունիկը» պատասխան խաղից առաջ, որը կայանալու է հուլիսի 21-ին Վ. Սարգսյանի անվան հանրապետական մարզադաշտում, բարդ իրավիճակում է հայտնվել: Չեմպիոնների լիգայի 3-րդ որակավորման փուլ անցնելու համար նա պետք է երկու գոլ խփի և ոչ մի գնդակ չընդունի իր դարպասում:

Հուլիսի 14-ին «Մետալուրգ» ՖԱ-ի ուսումնամարզական բազայում տեղի ունեցավ թիմի ժողովը, որում գլխավոր մարզիչ Նիկոլայ Կոստովը հայտարարեց այն մասին, որ «Մետալուրգի» նոր ավագն է դարձել Հենրիկ Մխիթարյանը, հաղորդում է ակումբի պաշտոնական կայքը: 21-ամյա ֆուտբոլիստն ասաց, որ ցանկացած խմբում ավագից կրկնակին են պահանջում թե երկրպագուները, թե մարզչական շտաբը:

«Կարծում եմ, Նիկոլայ Կոստովը լիովին վստահում է ինձ և համոզված եմ, որ ես կարող եմ իմ հետևից տանել թիմի խաղացողներին: Իմ կողմից հնարավոր ամեն ինչ կանեմ ինձ ցուցաբերած վստահությունն արդարացնելու համար»,- ասել է Մխիթարյանը:

Շախմատ. Շախմատի կրկնակի Օլիմպիական չեմպիոն, 2005 թվականի Աշխարհի գավաթակիր, Լինարեսի (2006) և Վեյք-ան-Զեեի (2007, 2008) սուպերառաջնությունների և Գրան-պրի ՖԻԴԵ-ի հաղթող, գրոսմայստեր Լևոն Արոնյանը Հայաստանում էր գտնվում: PanARMENIAN.Net ի թղթակցի հետ զրույցում նա ասել է, որ այս տարի 2 խոշոր առաջնության է մասնակցելու:

«Ես արդեն պատրաստվում եմ Chess Classic Mainz ամենամյա փառատոնին, որին մասնակցում եմ ամեն տարի: Իսկ արդեն աշնանը հավաքականի հետ միասին ելույթ կունենամ Օլիմպիադայում: Օլիմպիադան մեր բոլորիս համար շատ կարևոր է, մենք ջանում ենք պահպանել մեր արդյունքը»,- ասել է շախմատիստը: Արոնյանի խոսքով, ինքը դեռևս չի գտել իր ոճը: «Ես միշտ ավելի լավ եմ հիշում պարտված պարտիաները, քանի որ հաղթանակի դեպքում ես հասնում եմ դրված նպատակին»,- նշել է հայ շախմատիստը:

Շախմատային պրոֆեսիոնալների ընկերակցությունն (ՇՊԸ) ամփոփեց 2009- 2010 մրցաշրջանի ընթացքում իր հաշվարկած մրցումների ընդհանուր արդյունքները: Լավագույնը ճանաչվել է Վասիլի Իվանչուկը (2897 միավոր): Լևոն Արոնյանը և Վլադիմիր Կրամնիկը 2340-ական միավորով բաժանել են 2-3-րդ տեղերը:

Մարտունիում` Սևանա լճի ափին, կայացել է «Սևանա լիճ» շախմատային փառատոնը: Արդեն կայացել է 4 տուր, առաջատարն է Արման Փաշիկյանը: Տիգրան Պետրոսյանը Լուկա Լենիչի (Սլովենիա) նկատմամբ տարած հաղթանակի շնորհիվ 3 միավորով 2-րդ տեղում է: Ռոբերտ Հովհաննիսյանը 2.5 միավորով զբաղեցնում է 3-րդ տեղը:

Գրոսմայստեր Հրանտ Մելքումյանը և միջազգային վարպետ Գրիգոր-Սևակ Մխիթարյանը (Բրազիլիա) միջազգային բաց մրցաշարում հավաքել են 5 միավոր: Նշենք, որ մրցաշարն անցկացվում է Իսպանիայի Բենասկ քաղաքում: 6 խաղից հետո երկու շախմատիստներն էլ բրազիլացի առաջատարից հետ են մնում մեկ միավորով:

Վրաստանի Փոթի քաղաքում շարունակվում է «Նանա Ալեքսանդրիայի գավաթ» մրցաշարը: Հայ գրոսմայստեր Տիգրան Քոթանջյանը 3 հնարավորից հավաքել է 2,5 միավոր և գրավում է 4-րդ տեղը: Նա առաջատարներին զիջում է 0,5 միավորով: Կանանց միջև մրցումներում Անահիտ Խաչատրյանը հավաքել է 1,5 միավոր:

Բռնցքամարտ. WBA, WIBF և WBO վարկածներով կին-պրոֆեսիոնալների շարքում գերթեթև քաշային կարգում բռնցքամարտի աշխարհի չեմպիոնի տիտղոսակիր Սյուզի Կենտիկյանը (Գերմանիա) հուլիսի 17-ին կպաշտպանի իր տիտղոսները մեքսիկուհի Արելի Մուչինոյի դեմ պայքարում: Հայ բռնցքամարտիկը boxing.de-ի հետ հարցազրուցում ասել է, որ ծանոթ չէ հակառակորդի ոճին: «Ես երբեք չեմ թերագնահատում իմ մրցակիցներին: Մեր հանդիպումն ամեն դեպքում մարտ կլինի: Ես անհամբերությամբ սպասսում եմ այդ մենամարտին»,- ասել է Կենտիկյանը: Նա խոստովանել է, որ բռնցքամարտելու է իր սովորական ոճում, որի օգնությամբ միշտ ջախջախում է իր հակառակորդներին: «Մենամարտից առաջ ես հանգիստ եմ և կենտրոնացած»,- ասել է նա:

Գերմիջին քաշային կարգում հանդես եկող բրիտանացի բռնցքամարտիկ Կարլ Ֆրոչը, որն արդեն մերժել է մի քանի առաջարկներ Արթուր Աբրահամի (Գերմանիա) հետ մենամարտն անցկացնելու վայրի մասին, մենամարտն անընդհատ տեղափոխելու պատասխանատվությունը գցել է Աբրահամի փրոմոութեր Կալլե Զաուերլանդի ուսերին և քննադատության ենթարկել նրան: «Զաուերլանդը չպետք է խոսի բռնցքամարտի մասին, թող դա թողնի բռնցքամարտիկներին: Ինչ-որ բան որոշելու համար նա սկզբից պետք է հոր թույլտվությունը ստանա»,- ասել է Ֆրոչը:

Աբրահամի մասին նա ասել է. «Աբրահամի հետ մարտը բարդ կլինի, բայց նա, ինչպես միշտ, կդիմի խուլ պաշտպանության` ժամանակ առ ժամանակ պայթելով»:

Սամբո. Հուլիսի 16-19-ը Երևանի «Միկա» մարզահամալիրում կկայանա սամբոյի առաջին պատանեկան միջազգային մրցաշարը` նվիրված ԽՍՀՄ կրկնակի հերոս, օդաչու Նելսոն Ստեփանյանին, ինչպես նաև Հայրենական մեծ պատերազմի հաղթանակի 65-ամյակին: Մրցաշարը կազմակերպել են Հայաստանի Ազգային օլիմպիական կոմիտեն, Հայաստանի սամբոյի ֆեդերացիան և Հայաստանում «Ռուսհամագործակցության» ներկայացուցչությունը:Մրցաշարին կմասնակցեն Հայաստանի, Ռուսաստանի, Ուկրաինայի և Վրաստանի թիմերը:

Սամբոյի ֆեդերացիայի նախագահ Լևոն Հայրապետյանը հուլիսի 15-ին լրագրողների հետ հանդիպման ժամանակ ասաց, որ մրցաշարը ոչ միայն մարզական, այլ նաև խորհրդանշական բնույթ ունի. «Մենք ընտրել ենք հենց այդ տարիքային կարգը, որովհետև ցանկանում ենք մեր պատանի մարզիկների մոտ քարոզել և տարածել հայրենասիրական ոգի: Բացի դրանից, մրցաշարը մեզ համար աշխարհի առաջնության նախապատրաստական փուլ է, որը տեղի կունենա 2010-ի հոկտեմբերին Թբիլիսիում»,- ասել է Հայրապետյանը: Նրա խոսքերով, մրցաշարում Ռուսաստանը ներկայանալու է 3, Վրաստանը 2, Հայաստանը` 4 թիմերով: Օլիմպիադա. Սինգապուրի ամառային օլիմպիական պատանեկան առաջին խաղերի մեկնարկից 32 օր առաջ հայտնի դարձավ, որ Հայաստանի մարզիկների թիվն ավելացավ ևս երեքով: Միջազգային օլիմպիական կոմիտեն (ՄՕԿ) մասնակցության իրավունք է շնորհել աթլետ Դիանա Խուբասերյանին (100մ. Վազք), ջրացատկորդ Գևորգ Պապոյանին (3մ ոստնակացատկ ու 10մ աշտարակացատկ) և թիավար Էդգար Բաբայանին (կանոե,սպրինտ), հաղորդում է ՀԱՕԿ-ի մամլո ծառայությունը:Ավելի վաղ Սինգապուրի խաղերին մասնակցելու իրավունք էին նվաճել 9:

Թենիս. Արգենտինայի հավաքականը վերջին թիմն է, որը երաշխավորեց իր մասնակցությունը Դևիսի գավաթ-2010-ի կիսաեզրափակիչի խաղերին: Ռուսաստանի հավաքականը հանդիպել է Արգենտինայի թիմի հետ: Հինգերորդ` վճռական խաղում մրցեցին Միխայիլ Յուժնին և Դավիթ Նալբանդյանը: Նալբանդյանը հաղթանակ տարավ երեք սեթում 7:6, 6:4, 6:3 հաշվով: Սա արդեն Արգենտինայի հավաքականի երկրորդ հաղթանակն է Ռուսաստանի թիմի հանդեպ, ինչն էլ արգենտինացիներին հնարավորություն տվեց հակառակորդի հետ իր հաշիվը հավասարեցնել` 3:3:

Այժմ արդեն Դևիսի գավաթ-2010-ի կիսաեզրափակիչում կմրցեն Ֆրանսիան և Արգենտինան, Սերբիան և Չեխիան: Այս հաղթանակից հետո Դավիթ Նալբանդյանը նկատելիորեն լավացրել է իր դիրքը հուլիսի 12-ին հրապարակված АТР վարկանիշի նոր տարբերակում: Նա բարելավել է իր դիրքը 42 հորիզոնականով և այժմ գրավում է 111 տեղը:

Ծանրամարտի աշխարհի ուսանողական երկրորդ առաջնությանը, որը տեղի ունեցավ Թայփում (Թայվան), Աղասի Աղասյանը 77 կգ քաշային կարգում գրավել է առաջին տեղը:

Ծանրամարտ. Աղասյանն առաջին հայ մարզիկն է, որը կարողացավ Ունիվերսիադայում աշխարհի չեմպիոն դառնալ: «Մեր հավաքականի ելույթները ես նորմալ եմ համարում, կարևորն այն է, որ մենք ոսկե մեդալ նվաճեցինք: 2012 թ. խաղերը հավանաբար կանցկացվեն Չինաստանում, իսկ 2014 թ.` Կազանում», - ասել է Խաչատրյանը: Ֆեդերացիայի նախագահը նշել է, որ Հայաստանի տղամարդկանց հավաքականի գլխավոր մարզիչ Աշոտ Մխիթարյանի մահվանից հետո հավաքականը ժամանակավորապես կղեկավարի ֆեդերացիայի մամլո քարտուղար Փաշիկ Ալավերդյանը: «Աշխարհի առաջնությունից հետո, որը տեղի կունենա Անթալիայում և վարկանշային կլինի, որտեղ մարզիկները կկարողանան նվաճել 2012թ. Օլիմպիադայում հանդես գալու իրավունքը, մենք հավաքականի նոր մարզիչ կընտրենք»,-ասել է ֆեդերացիայի նախագահը:

Նրա խոսքերի համաձայն, առաջնությանը կմասնակցեն մոտավորապես 1350 ծանրամարտիկ` 187 երկրից, վարկանիշ կստանան 210 ծանրամարտիկ և 140 ծանրամարտուհի: «Մենք պետք է արժանի ելույթ ունենանք: Այս տարի առնվազն 4-5 ծանրամարտիկ և գոնե 4 ծանրամարտուհի պետք է Օլիմպիադայի ուղեգրեր նվաճեն: Հաջորդ տարի առաջնությունը կանցնի Փարիզում և կրկին վարկանշային կլինի»:

Աշխարհի առաջնությանը չի մասնակցի 2009 թ. չեմպիոն Նազիկ Ավդալյանը (69ք/կ): Նա մարզումների ընթացքում վնասվածք է ստացել: «Նազիկն այս տարի չի մասնակցի աշխարհի առաջնությանը, քանի որ մենք ցանկանում ենք, որ նա լիովին վերականգնվի և նախապատրաստվի Եվրոպայի 2011 թվականի առաջնությանը և աշխարհի առաջնությանը»,-ասել է Խաչատրյանը: Օգոստոսին Հայաստանի պատանիների հավաքականը կմասնակցի Սինգապուրի պատանեկան օլիմպիական խաղերին: Հայաստանն այնտեղ կներկայացնեն երկու ծանրամարտիկ:

Գոլբոլ. 2010 թ. Ռուսաստանի չեմպիոն դարձած գոլբոլի Թագուհի ակումբի երեք խաղացողներ` Գրգորի Դոմբրովսկին, Ալեքսեյ Շիպիլովը և Դմիտրի Ելինը հայկական չորս ակումբների հետ միասին Դիլիջանում անցկացնում են ուսումնամարզական հավաքներ:

«Մենք հետաքրքրվում էինք, թե որտեղից կարել է ձեռք բերել գոլբոլի գնդակներ և հենց այդ ժամանակ էլ իմացանք Հայաստանի թիմի մասին ու սկսեցինք նրանց հետ շփվել: Հետո մենք որոշեցինք հավաքներ անցկացնել Հայաստանի թիմի հետ: Համատեղ հավաքներն ավելի արդյունավետ են», - ասել է Ալեքսեյ Շիպիլովը PanARMENIAN.Net ի թղթակցի հետ զրուցելիս: Ռուս մարզիկներին դուր էր եկել Հայաստանում անցկացվող մրցումները և հասարակության արձագանքը:

Թագուհի ակումբը հիմնադրվել է 2002 թ.` թույլ տեսողությամբ և կույրերի գիշերօթիկ դպրոցի աշակերտների շրջանում: Ռուս մարզիկները գտնում են, որ հայ գոլբոլիստները երիտասարդ են, տաղանդավոր, իսկ ամենակարևորն այն է, որ նրանք հաջողության հասնելու ձգտում ունեն ու նրանց մեծ ապագա է սպասում:

Ռուս գոլբոլիստներին շատ էր զարմացրել այն, որ Հայաստանի ֆիզկուլտուրայի ինստիտուտը սահմանափակ ֆիզիկական հնարավորություններով մարդկանց հնարավորություն չէր ընձեռում կրթություն ստանալու: «Մեզ մոտ յուրաքանչյուր ինստիտուտում հաշմանդամ մարդկանց խմբեր են հավաքում», - ասել է Շիպիլովը:

Համատեղ հավաքներից հետո կհամալրվի Հայաստանի հավաքականը, որը Իրանի Սանանդաջե քաղաքում կմասնակցի միջազգային մրցումներին, իսկ ռուս մարզիկները կնախապատրաստվեն Եվրոպայի առաջնությանը:

Կորոլևա թիմը շատ ուժեղ է, և հայ գոլբոլիստները հնարավորությու ունեն վարպետության դասեր ստանալ ռուս մարզիկներից: «Մարզումներն ընթանում են շատ խիստ ժամանակացույցով` մարզիկները մարզվում են օրական 2 անգամ: Դրանից հետո կձևավորվի Հայաստանի գոլբոլի հավաքականը, որը հուլիսի 29-ից օգոստոսի 3-ը Իրանի Սանանդաջ քաղաքում կմասնակցի միջազգային առաջնության»,- ասել է Ռոստոմյանը:

Հասմիկ Բաբայան, Գոհար Նալբանդյան / PanARMENIAN News
 Ամենաընթերցվողը բաժնում
Մասնագետը՝ առողջ ապրելակերպի մասին
Ինչու են կանայք ընտրում ֆիթնես և բոդիբիլդինգ
Լավագույն app-երը՝ առավել զգուշավորների այլընտրանք
Ինչպես են մարզասրահները և մարզվողները «ֆորմի մեջ» մնում
 Ուշադրության կենտրոնում
Մարմնամարզիկ Արթուր Դավթյանը Աշխարհի գավաթի եզրափակչում է

Մարմնամարզիկ Արթուր Դավթյանը Աշխարհի գավաթի եզրափակչում է Ավելի վաղ եզրափակիչ էին դուրս եկել Արթուր Ավետիսյանն ու Վահագն Դավթյանը

 Բաժնի այլ նյութերը
Easy ֆուտբոլ՝ մեծ էկրանին Դարձիր «12-րդ խաղացող» Անգլիական այգում, երկրպագիր մերոնց մաքուր օդին
Ուղին անվանում է առաջնամագլցողը Հարմարավետության գոտուց դուրս, քաղաքային աղմուկից հեռու
Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի
---