Արթուր Ալեքսանյանը ըմբշամարտի աշխարհի առաջնությունում նվաճել է ոսկե մեդալ

PanARMENIAN.Net - Բռնցքամարտ- Պրոֆեսիոնալ բռնցքամարտիկ, գերթեթև քաշային կարգում WBA, WIBF և WBO վարկածներով աշխարհի չեմպիոն Սյուզի Քենտիկյանը (Գերմանիա) հուլիսի 17-ին պաշտպանեց իր տիտղոսները մեքսիկուհի Արելի Մուչինոյի հետ մենամարտում:

3-րդ ռաունդի սկզբում Մուչինոն և Քենտիկյանը բախում են գլուխները, որից հետո հայ մարզուհու մոտ արյունահոսություն է սկսվում, մենամարտը դադարեցվում է: Մարտն ավարտվում է առանց հաղթողի, այնուամենայնիվ Սյուզի Քենտիկյանը պահպանում է WBA, WIBF և WBO տիտղոսները, քանի որ մեքսիկուհին խախտել էր խաղի կանոնները:

Մենամարտից հետո Քենտիկյանն ասել է, որ առաջին ռաունդում նա վատ էր մենամարտում: «Հետո ես կարողացա կողմնորոշվել և սկսեցի ավելի արագ գործել: Ես շատ տխուր եմ և վշտացած, քանի որ ցանկանում էի դրսևորել իմ բոլոր հնարավորությունները»,-ասել է Քենտիկյանը, հաղորդում է boxing.de-ն:

Հոկտեմբերի 2-ին Մոնտե Կառլոյում (Մոնակո) «Super Six World Boxing Classic» մրցաշարի շրջանակներում տեղի կունենա գերմիջին ք/կ-ում անցկացվող մենամարտը բրիտանացի Կառլ Ֆրոչի և Արթուր Աբրահամի միջև:

Աբրահամը մրցաշարը սկսեց ամերիկացի Ջերմեն Թեյլորին նոկաուտի ենթարկելով, բայց երկրորդ մարտում, հանդիպելով Անդրե Դիրելին, նա որակազրկվեց արգելված հարվածի համար, և նրա հաշվին գրանցվեց պարտություն, ինչը առաջինն էր Աբրահամի արհեստավարժ կարիերայում:

«Ես չեմ համբերում, թե երբ եմ ռինգ դուրս գալու: Պետք է նշեմ, որ հաճախ եմ հիշում Դիրելի հետ մարտում իմ որակազրկումը, և միայն Ֆրոչի հանդեպ հաղթանակը կհանգստացնի ինձ»,- ասել է Աբրահամը:

Ֆրոչը նույնպես մրցաշարը սկսել էր հաղթանակով և պարտության էր մատնել Դիրելին: «Ես հարգում եմ Աբրահամին` ընդունակությունների և ձեռքբերումների համար, բայց պատրաստվում եմ նոկաուտի ենթարկել նրան և վայր գցել նրա թագն ուղիղ նրա փրոմուոթերի ծնկներին: Ես լիովին գիտակցում եմ Աբրահամից եկող վտանգը: Բայց Մոնակոյում հաղթողը ես կլինեմ»,- ասել է Ֆրոչը:

Սամբո- Երևանում ավարտվեց սամբոյի միջազգային պատանեկան մրցաշարը, որը նվիրված էր ԽՍՀՄ կրկնակի հերոս, օդաչու Նելսոն Ստեփանյանի հիշատակին, ինչպես նաև Մեծ հայրենական պատերազմում տարած հաղթանակի 65-ամյակին: Տղաների 10 քաշային կարգերում և աղջիկների 3 քաշային կարգերում անցած մրցաշարին մասնակցել է 143 մարզիկ Հայաստանից, Լեռնային Ղարաբաղից, Ռուսաստանից ու Վրաստանից:

Ընդհանուր թիմային հաշվարկում առաջին տեղում է Հայաստանի հավաքականը 30 մեդալով` 7 ոսկե, 5 արծաթե և 18 բրոնզե: ՌԴ-ի հավաքականը երկրորդ տեղում է 12 մեդալով, Վրաստանի հավաքականը 3-րդ տեղում է 9 մեդալով: Մրցաշարը կազմակերպել էին Հայաստանի սամբոյի ֆեդերացիան և Հայաստանում «Ռուսհամագործակցության» ներկայացուցչությունը, ինչպես նաև Հայաստանի Ազգային օլիմպիական կոմիտեն:

Շախմատ- - Հուլիսի 19-ին Մարտունիում ավարտվեց «Սևանա լիճ» շախմատի միջազգային մրցաշարը: Վերջին 9-րդ տուրում Արման Փաշիկյանը կիսեց միավորները Դավիթ Հարությունյանի (Վրաստան) հետ, իսկ Ավետիք Գրիգորյանը Մաքսիմ Մատլակովի (ՌԴ) հետ:

Սամվել Տեր-Սահակյանը հաղթեց Պավել Պոնկրատովին (ՌԴ), Տիգրան Պետրոսյանը` Ռոբերտ Հովհաննիսյանին, Լուկա Լենիչը (Սլովենիա)-Գոպալ Գիտա Նառայանանին (Հնդկաստան):

6 միավորով մրցաշարի հաղթող դարձավ Փաշիկյանը: Պետրոսյանը, որը նույնպես 6 միավոր էր հավաքել, գրավեց 2-րդ տեղը, 3-րդը զբաղեցրեց Մատլակովը` նա վաստակել էր 5 միավոր:

Միջազգային վարպետ Գրիգոր Սևակ Մխիթարյանը (Բրազիլիա) և գրոսմայստեր Կարեն Մովսիսյանը հավաքել են 7,5 միավոր, իսկ Զավեն Անդրեասյանը` 6,5 միավոր:

Հունաստանի Ռետիմնո քաղաքում տեղի ունեցած միջազգային շախմատային մրցաշարում Գաբրիել Սարգսյանը հավաքել էր 7 միավոր և լրացուցիչ արդյունքներով գրավել է 2-րդ տեղը:

Ֆուտբոլ- Հուլիսի 21-ին Վազգեն Սարգսյանի անվան հանրապետական մարզադաշտում չեմպիոնների լիգայի որակավորման փուլի պատասխան խաղում «Փյունիկը» հանդիպել է «Պարտիզանի» հետ: Խաղն ակտիվ սկսեցին «Փյունիկի» ֆուտբոլիստները: 18-րդ րոպեին «Փյունիկը» կազմակերպեց վտանգավոր հարձակում: Հարձակվողների եռյակը` Մարկոս Պիզելին, Գևորգ Ղազարյանը և Հովհաննես Գոհարյանը գեղեցիկ խաղ ցուցադրեցին, սակայն Պիզելիի հարվածից հետո «Պարտիզանի» դարպասապահը բռնեց գնդակը:

Մինչև առաջին խաղակեսի ավարտը «Փյունիկի» խաղացողները չկարողացան պահել հաշիվը: Ավելացված րոպեի ընթացքում «Պարտիզանի» միակ գոլը խփել է Կլեոն; Խաղն ավարտվել է 1:0 հաշվով` հօգուտ «Պարտիզանին»: Տեղի ունեցած երկու խաղերի արդյունքում 4:1 հաշվով հաղթել է «Պարտիզանը» և դուրս է եկել հաջորդ փուլ:

«Փյունիկի» գլխավոր տնօրեն Վարդան Մինասյանն ընդգծել է, որ նման խաղերում միշտ լարվածություն է լինում: «Մենք երկու խաղերում էլ չկարողացանք ցույց տալ մեր հնարավորությունները: Այդպիսի խաղերում հաղթանակի համար պետք է խաղան 11 ֆուտբոլիստ, այլ ոչ 7-8, ինչպես Հայաստանի առաջնությունում», - ասել է Մինասյանը:

Հետագա պայքարից հեռացավ նաև «Միկան», որը հուլիսի 22-ին Երևանում Եվրոպայի լիգայի որակավորման երկրորդ փուլում խաղաց «Ռաբոտնիչկիի» (Մակեդոնիա) հետ: Խաղն ավարվեց 0:0 հաշվով, սակայն երկու խաղերի արդյունքով` 1:0, Եվրոպայի լիգայի հաջորդ փուլ դուրս եկավ Մակեդոնիայի թիմը;

Հանդբոլ- Այս տարվա աշնան սկզբին Լոռու մարզում կկայանա հանդբոլի երկու մրցաշար: Սեպտեմբերի 1-5-ին Վանաձորի մարզապալատը կհյուրընկալի Հայաստանի վարչապետի գավաթի խաղարկության տղամարդկանց մրցաշարի մասնակիցներին: Զուգահեռ կանցկացվի նաև մինչև 16 տարեկան հանդբոլիստների և հանդբոլիստուհիների Հայաստանի առաջնության երկրորդ փուլը:

Հայաստանի ներկայացուցիչներից բացի կմասնակցեն նաև Իրանի, Վրաստանի և Բելառուսի ընտրանիները: Մրցաշարին ներկա գտնվելու համար բարձրաստիճան հյուրեր են գալու Եվրոպայի հանդբոլի ֆեդերացիայից և մասնակից երկրներից: Հայաստանի հավաքականի գլխավոր մարզիչն է Էդիկ Օհանյանը, նրա ղեկավարությամբ հավաքականի հինգ թեկնածուներ Երևանում նախապատրաստական պարապմունքներ են անցկացնում: Եվս 9 խաղացողներ Ֆրանսիայից Հայաստան կժամանեն ավելի ուշ, և օգոստոսի 28-ից սկսած մինչև մրցաշարի մեկնարկը հավաքականը կմարզվի Վանաձորում, հաղորդում է հանդբոլի ֆեդերացիայի պաշտոնական կայքը:

Օլիմպիական խաղեր- - Սինգապուրում օգոստոսի 14-26-ին անցկացվելիք օլիմպիական պատանեկան ամառային առաջին խաղերի մասնակցի ուղեգիր ստացան նաև Հայաստանի երկու լողորդներ` Անահիտ Բարսեղյանը, որը կմրցի թիկնալողում (50մ և 100մ), և Սերգեյ Պևնեևը` ազատ լողաոճում (50մ և 100մ):

Նրանց մասնակցությունը հաստատել է միջազգային օլիմպիական կոմիտեն: Սինգապուր կմեկնեն Հայաստանի 14 մարզիկներ, ասվում է Հայաստանի ազգային օլիմպիական կոմիտեի պաշտոնական կայքում:

ՌԴ կառավարության փոխնախագահ, ՌԴ Ազգային օլիմպիական կոմիտեի նախագահ Ալեքսանդր Ժուկովը և Հայաստանի վարչապետ Տիգրան Սարգսյանը հուլիսի 17-ին Երևանում երկկողմ համաձայնագիր են կնքել երկու երկրների Ազգային օլիմպիական կոմիտեների միջև:

Ինչպես համատեղ ասուլիսում հայտնել է ՀՀ վարչապետը, ռուսական կողմի հետ քննարկվել են համագործակցության մի շարք ուղղություններ սոցիալական, առողջապահության, կրթության, սպորտի ու կենսաթոշակային բարեփոխումների ոլորտներում: Տիգրան Սարգսյանն ասել է նաև, որ երկկողմ հարաբերությոնների զարգացումն ուղղված է Հայաստանում մարզաբազաների օգտագործմանն ու կառուցմանը:

Իր հերթին ՌԴ փոխվարչապետը նշել է, որ ինչպես ՌԴ-ում, այնպես էլ Հայաստանում բարեփոխումների հետաքրքիր գործընթաց է տեղի ունենում: «Իմ այցի գլխավոր նպատակն առավել սերտ կապերի հաստատումն է սպորտի զարգացման համար»,-ասել է նա: Ժուկովը հավելել է, որ Հայաստանը դեռևս խորհրդային տարիներից հայտնի է որպես մարզական ավանդույթներով երկիր և այժմ ակտիվ դերակատարություն ունի միջազգային սպորտում: Նա հավելեց նաև, որ մարզիկների նախապատրաստումը Հայաստանի լեռնային շրջաններում միշտ դրական արդյունք էր տալիս օլիմպիական խաղերում:

Ժուկովը հայտնել է նաև, որ հայկական կողմը հետաքրքիր առաջարկություն է արել` ներդրումային նախագիծ իրականացնել Սևանում մարզաբազա ստեղծելու համար: Նա հավելել է, որ այդ նախագիծը լավ լրացում կլինի արդեն գործող Ծաղկաձորի մարզաբազայի համար, որտեղ կմարզվեն ատլետները, լողորդները, դահուկորդները և այլ մարզաձևերի ներկայացուցիչները:

Թիավարում- Ակադեմիական թիավարման Հայաստանի երիտասարդական հավաքականը հուլիսի 23-ին կմեկնի Չեխիա` մասնակցելու մինչև 18 տարեկանների առաջնությանը: Մինչև աշխարհի առաջնության մեկնարկը, հավաքականը 12-օրյա ուսումնամարզական հավաքներ կանցկացնի:

PanARMENIAN.Net ի թղթակցի հետ զրույցի ընթացքում ակադեմիական թիավարման Հայաստանի հավաքականի գլխավոր մարզիչ Վարդան Ադամյանն ասել է, որ առաջնությանը մասնակցելու է երկու մարզիկ: Նա նաև նշել է, որ սեպտեմբերի 12-15-ը Պորտուգալիայում անցկացվելու է Եվրոպայի առաջնություն, որին մասնակցելու են Մակար Սարգսյանը և Սարգիս Ղարաբաղցյանը: Իսկ երիտասարդ մարզիկները բայդարկայի և կանոեի վրա թիավարման ձևերում հուլիսի 29-31-ին կմասնակցեն մինչև 19 և 23 տարեկանների Եվրոպայի առաջնությանը: