H1N1 գրիպի հարուցիչը գրանցվել է 20 երկրում, ԱՀԿ-ը պատրաստ է հայտարարել պանդեմիկ սպառնալիքի 6-րդ մակարդակ

PanARMENIAN.Net - Առողջապահության համաշխարհային կազմակերպությունը (ԱՀԿ) պատրաստ է հայտարարել A/H1N1 գրիպի հարուցիչի («խոզի գրիպ»)պանդեմիկ սպառնալիքի 6-րդ մակարդակի մասին, իսպանական «El Pais» թերթին տված հարցազրույցում հայտարարել է կազմակերպության գլխավոր տնօրեն Մարգարետ Չենը, չճշգրտելով, թե դա հատկապես երբ տեղի կունենա: «6-րդ մակարդակն ամենեւին չի նշանակում, որ աշխարհի վերջը եկել է: Բոլորին հարկ է հիշել այդ մասին, հակառակ դեպքում մենք կարող ենք սպառնալիքի բարձրագույն մակարդակի հայտարարման ժամանակ բախվել անտեղի խուճապի», - փորձել է հասարակությանը հանգստացնել ԱՀԿ ղեկավարը: «Գրիպի հարուցիչները ծայրահեղ անկանխատեսելի են, յուրաքանչյուր տարատեսակ խաբուսիկ է: Հարկավոր չէ գերագնահատել սեփական ուժերը», - ավելացրել է Մ. Չեն:



Մինչդեռ, ԱՀԿ պաշտոնական տվյալներով, A/H1N1 գրիպի հարուցիչից վարակման դեպքեր գրանցվել են արդեն 20 երկրում:



Լաբորատորիայում հաստատվել է խոզի գրիպով վարակման 985 դեպք, այդ թվում 226-ն ԱՄՆ-ում (1 մահացու), Մեքսիկայում` 590 դեպք (25 մահացու, երկրի կառավարությա տվյալներով` 701 եւ 26): Հետեւյալ երկրներում լաբորատորիայում հաստատված վարակման դեպքեր են գրանցվել` առանց մահացու ելքի. Ավստրիա (1), Կանադա (85), Չինաստան (Հոնկոնգ 1), Կոստա-Ռիկա (1), Կոլումբիա (1), Դանիա (1), Սալվադոր (2), Ֆրանսիա (2), Գերմանիա (8), Իռլանդիա (1), Իսրայել (3), Իտալիա (1), Նիդերլանդներ (1), Նոր Զելանդիա (4), Հրավային Կորեա (1), Իսպանիա (40), Մեծ Բրիտանիա (15):