Երևանյան համերգից առաջ երաժիշտները համերգներ են ունեցել ԱՄՆ-ում, Մեծ Բրիտանիայում, Ֆրանսիայում, Գերմանիայում, Բելգիայում, Նիդերլանդներում և Ռուսաստանում: Երեք շաբաթվա ընթացքում նրանք տասնյակ հանդիպումներ են ունեցել լրագրողների հետ՝ հանրության ուշադրությունը հրավիրելով հայերի զանգվածային ոչնչացման փաստի ճանաչմանը:
System Of A Down-ի համար միշտ կարևոր տեղ է զբաղեցրել Ցեղասպանության թեման: Խմբի բոլոր անդամներն ունեն հայկական ծագում և ողբերգությունը վերապրածների ժառանգներն են: Հենց այդ ողբերգությանն էլ նվիրված են խմբի P.L.U.C.K. և Holy Mountains երգերը, ինչպես նաև 2006 թվականին նկարահանված «Ճչացողները» ֆիլմը, որը ստեղծվել է երաժիշտների ակտիվ աջակցության շնորհիվ:
System Of A Down. «Միակ ուժը, որ կարող է ինչ-որ բան փոխել, մենք ենք»:
Rolling stone ամսագիրը հավաքել է նրանց շրջագայության ընթաքում արված բոլոր կարևոր բացահայտումները:
Հայոց ցեղասպանության ճանաչման մասին
Թանկյան. «Կարծում եմ՝ սա պարզապես ժամանակի խնդիր է, և Թուրքիան կառերեսվի սեփական պատմությանը: Ամբողջ աշխարհն է ճնշում նրան՝ Ցեղասպանագետների միջազգային ասոցիացիան, հայտնի գիտնականները, պատմաբանները: Նրանք ստիպված կլինեն հաշտվել իրականության հետ: Մենք շատ ուրախ էինք, որ Հռոմի Պապը պաշտոնապես ճանաչել է Ցեղասպանությունը՝ այն անվանելով 20-րդ դարի առաջին ցեղասպանությունը և խոստանալով բացել դրա վերաբերյալ Վատիկանի պահոցները: Նա նման հայտարարություններ էր անում դեռևս Արգենտինայում՝ նախքան Պապ դառնալը, և մենք ուրախ ենք, որ կա նման ղեկավար, որը չի հրաժարվում իր դիրքորոշումից, նույնիսկ զբաղեցնելով ավելի բարձր դիրք՝ շարունակում է պաշտպանել ճշմարտությունը»:
Թուրքերի հետ հարաբերությունների մասին
Թանկյան. «Իրականում մենք շատ երկրպագուներ ունենք Թուրքիայում և շատ շնորհակալ ենք նրանց, որովհետև մի քանի տարի առաջ թուրքական ԶԼՄ-ները փորձում էին արատավորել խմբի անունը, մենք նույնիսկ հերքում էինք տեղադրել մեր կայքում: Իսկ երկրպագուները, իրենց հերթին, պաշտպանում էին մեզ և գրում էին թերթերի խմբագիրներին: Մենք ցանկանում էինք Ստամբուլը ներառել մեր շրջագայության մեջ, սակայն վարչապետի վարչակազմը մերժեց մեզ: Կցանկանայի հավելել, որ Հայոց ցեղասպանությունը հանցագործություն է մարդկության դեմ, և ոչ թե առանձին հայ-թուրքական խնդիր: Այժմ Թուրքիայում կա ազդեցիկ քաղաքացիական շարժում, որին մասնակցում են մի շարք գիտնականներ, գրողներ, լրագրողներ, արվեստի գործիչներ, որոնք պայքարում են Թուրքիայի ժողովրդայնացման և Ցեղասպանության փաստի ճանաչման համար»:
Հայաստանի ազատագրության հայ գաղտնի բանակի (ԱՍԱԼԱ)մասին
Թանկյան. «Անձամբ ես, ինչպես խմբի բոլոր անդամները, դեմ ենք բռնության ցանկացած տեսակին: Բռնությունը բռնություն է ծնում, այլ կերպ չի լինում: Պատմության ընթացքում մենք շատ հեղափոխությունների օրինակներ ենք տեսել, երբ մարդիկ զենք էին վերցնում, որպեսզի պայքարեն անարդարության դեմ, կառավարություններ էին տապալում, կարելի է հասկանալ՝ ինչու էին այդպես վարվում: Սակայն, ընդհանուր առմամբ, բռնությունը տարբերակ չէ, այն ելք չէ»: Դոլմայան. «Թող տարօրինակ թվա, սակայն իմ կարծիքով՝ Գանդին վերջին տասնամյակներին ամենաիմաստուն մարդն էր»:
Նոր երգերի մասին
Դոլմայան. «Այժմ մենք զբաղված ենք միայն այս շրջագայությամբ, կենտրոնացած ենք դրա հիմնական նպատակի շուրջ: Անձնական զրույցներում, իհարկե, քննարկում ենք, թե ինչ կարող է լինել հետագայում, սակայն այժմ չէինք ցանկանա շեղվել շրջագայության հիմնական նպատակից: Անհրաժեշտ է մարդկանց ուշադրությունը հրավիրել Հայոց ցեղասպանության ճանաչման խնդրին և դրա 100-րդ տարելիցին: Միաժամանակ, ուզում ենք մարդկանց ուշադրությունը հրավիրել այն բանին, որ այսօր էլ են տեղի ունենում ցեղասպանություններ աշխարհի տարբեր կետերում՝ Աֆրիկայում, Իրաքում և այլ երկրներում»:
Ի՞նչ էր լսում System Of A Down-ը երիտասարդ ժամանակ
Դոլմայան. «Երկար պատասխան կլինի, սակայն եթե կարճ կապենք՝ մենք ամեն ինչ էլ լսում էինք, ռոքից ու ջազից սկսած մինչև դասական երաժշտություն»:
Իրենց ոգեշնչող հայերի մասին
Դոլմայան. «Ինձ համար նման մարդ է պապիկս: Նա վերապրել է Ցեղասպանությունը, ձեռնունայն եկել Լիբիա, վերականգնել իր և ընտանիքի կյանքը, հետագայում կռվել Երկրորդ համաշխարհայինում: Նա լավ մարդ էր»:
Կարդացեք նաև՝ 7 փաստ, որ պետք է իմանալ System of a Down-ի մասին