2017-ի մայիսին Հովհաննես Այվազովսկու ծննդյան 200-ամյակին նվիրված մեծ ցուցահանդես կբացվի Երևանում: Այդ մասին հայտարարել է Ազգային պատկերասրահի տնօրեն Արման Ծատուրյանը:
«Ցուցահանդեսը կգործի Հայաստանի Ագզային պատկերասրահում, մենք արդեն մոտ մեկ տարի է պատրաստվում ենք դրան: Կներկայացվի Այվազովսկու ավելի քան 70 կտավ, որոնք պահվում են պատկերասրահում, այդ թվում նրա գծանկարները, որոնք նախկինում չեն ցուցադրվել»,-ասել է Ծատուրյանը:
Ըստ նրա, հատուկ ցուցահանդեսի համար Հայաստան կբերվի Այվազովսկու 16 նկար` Տրետյակովյան պատկերասրահից, Պետերգոֆի թանգարանից և Ռուսական թանգարանից, գրում է «Նովոստի Արմենիան»:
Մոսկվայի Տրետյակովյան պատկերասրահում հուլիսի 29-ից նոյեմբերի 20-ը անցկացված մեծ ծովանկարիչ Հովհաննես Այվազովսկու ցուցահանդեսը գերազանցել է Վալենտին Սերովի ցուցահանդեսի ռեկորդը` այն գրեթե 600.000 մարդ է այցելել:
«Մենք բանակցում ենք Մխիթարյանների միաբանության հետ, որպեսզի կարողանանք Երևանում ներկայացնել Այվազովսկու «Քաոս» կտավը, որը նրա գլուխգործոցներից մեկն է համարվում: Նախատեսվում է նաև վերանորոգել բոլոր ցուցասրահները, որտեղ ցուցադրվելու են մեծ ծովանկարչի նկարները: Եթե հաջողվի ամեն ինչ անել, ինչպես ծրագրել ենք, վստահեցնում եմ, դա եզակի ցուցահանդես է լինելու»,-ասել է նա:
Ըստ Ծատուրյանի, Թեոդոսիայի Այվազովսկու անվան պատկերասրահից նկարներ չեն ցուցադրվելու, քանի որ այդ աշխատանքները ցուցադրվում են միայն Ռուսաստանի տարածքում: