Հայաստանի ֆուտբոլի ֆեդերացիան պայմանավորվածություն էր ձեռք բերել Ուզբեկստանի ֆուտբոլի ֆեդերացիայի հետ երկու երկրի ազգային հավաքականների միջև ընկերական հանդիպման անցկացման վերաբերյալ:
Հանդիպումը նախատեսված էր անցկացնել փետրվարի 12-ին Թուրքիայի Անթալիա քաղաքում:
Հաշվի առնելով այն հանգամանքը, որ վերջին շրջանում Թուրքիայի տարածքում հաճախակի բնույթ են կրում ահաբեկչական ակտերը, անվտանգության նկատառումներից ելնելով, Հայաստանի ֆուտբոլի ֆեդերացիան որոշում է կայացրել հրաժարվել Ուզբեկստանի հավաքականի հետ ընկերական հանդիպումից:
Ինքնաձիգով զինված ահաբեկիչն Ամանորի գիշերը գրոհել է Ստամբուլի Retina գիշերային ակումբը, որտեղ մոտ 700 այցելու է եղել: Ոճրագործին զոհ է գնացել 39 մարդ, ևս 69-ը ստացել է տարբեր աստիճանի վիրավորումներ և վնասվածքներ: Կատարվածի պատասխանատվությունը ստանձնել է ահաբեկչական «Իսլամական պետություն» խմբավորումը: