Ճապոնացի լրագրող Յոջի Գոմին բացահայտել է ՀԿԺՀ առաջնորդ Կիմ Չեն Ինի սպանված եղբոր` Կիմ Չեն Նամի վերաբերյալ որոշ մանրամասներ:
2012-ին Գոմին գիրք էր հրատարակել, որի հիմքում զոհվածի հետ անձնական զրույցներն էին ու էլեկտրոնային նամակագրությունը:
Ըստ լրագրողի, Կիմ Չեն Նամը նույնիսկ Հյուսիսային Կորեայից մեկնելուց առաջ կողմ էր հանդես գալիս բարեփոխումներին: Ավելի ուշ նա համոզմունք էր հայտնել, որ առանց փոփոխությունների հյուսիսկորեական ռեժիմը կփլուզվի, իսկ Կիմ Չեն Ինը երկար չի մնա իր պաշտոնում, հայտնում է Lenta.ru-ն:
Միևնույն ժամանակ Գոմին պնդում է, որ Կիմ Չեն Նամին երբեք չեն տեսել եղբոր հետ, իսկ անձնական զրույցներում, երբ հիշատակվում էր նրա անունը, նա «քրտնում էր ու կաշկանդվում»:
Նա նաև վստահություն է հայտնել, որ Կիմ Չեն Նամի սպանությունը կարող է վատթարացնել ՀԿԺՀ և Չինաստանի հարաբերությունները, քանի որ սպանվածն ապրում էր Չինաստանում և նույնիսկ անվտանգության երաշխիքներ ուներ Պեկինից:
Չինաստանը դեռ պաշտոնապես չի մեկնաբանել Կիմ Չեն Նամի սպանությունը: