ՌԴ ԱԳՆ-ն անընդունելի է համարում Թուրքիայի հարվածները քրդերի դիրքերին Սիրիայում և Իրաքում: Այդ մասին ասվում է գերատեսչության հայտարարության մեջ:
ԱԳՆ-ն հիշեցրել է, որ քրդերն ահաբեկչական խմբավորումներին, առաջին հերթին ԻՊ-ին ցամաքում իրապես դիմակայող ուժ են: «Այն պայմաններում, երբ ահաբեկչության դեմ պատերազմը Սիրիայում և Իրաքում դեռ հեռու է ավարտից, այդպիսի գործողությունները միանշանակ չեն նպաստում հակաահաբեկչական ուժերի համախմբմանը և սրում են առանց այդ էլ լարված իրավիճակը»,-ասվում է հաղորդագրության մեջ:
ՌԴ ԱԳՆ-ն մտահոգված է նաև այն հանգամանքով, որ թուրքական ուժերը հարված են հասցրել ինքնիշխան պետությունների տարածքում առանց տեղի իշխանությունների հետ համաձայնեցման: Այդպիսի գործողություններն, ըստ գերատեսչության, անընդունելի են և հակասում են միջազգային իրավունքի հիմնարար նորմերին, հայտնում է ՌԻԱ Նովոստին:
Ավելի վաղ Թուրքիայի գործողությունները քրդերի դեմ քննադատել էր նաև ԱՄՆ Պետքարտուղարությունը:
Ապրիլի 25-ին Թուրքիան ավիահարվածներ է հասցրել քրդերի դիրքերին Սիրիայում և Իրաքի հյուսիսում: Զոհվել է 70 մարդ: Ավելի ուշ Թուրքիայի նախագահ Էրդողանը հայտարարեց, թե զգուշացրել էր հարվածների մասին Հյուսիսային Քրդստանի իշխանություններին, ինչպես նաև ՌԴ-ին և ԱՄՆ-ին:
Սիրիայի քուրդ աշխարհազորայինների ջոկատներ (YPG) իրենց հերթին Թուրքիայի ավիահարվածներից հետո կոչ են արել թռիչքներից զերծ գոտի ստեղծել երկրի հյուսիսում:
