Ռուսաստանցի դիզայներ Վարդուհի Նազարյանը գարուն-ամառ-2018 հագուստի հավաքածուն ստեղծել է՝ ոգեշնչվելով Սերգեյ Փարաջանովի երևանյան տուն-թանգարան այցելությամբ, գրում է ռուսական L'OFFICIEL-ը:
Նշվում է, որ նոր հավաքածուի ստեղծման գաղափարը ծնվել է 2013-ին, երբ դիզայները Երևանում այցելել էր Փարաջանովի տուն-թանգարան և տեսել 1978-ի «Կրեպ դե ջինի» նմուշները» գործը: «Իմ կյանքը կիսվեց 2 մասի՝ տեսածից առաջ և հետո: Բայց մոտ 3 տարի պահանջվեց, որպեսզի ես կարողանայի գիտակցված օգտագործել նրա ժառանգությունը՝ սեփական զգեստները ստեղծելով: Ես հավաքել եմ շիֆոնի և նուրբ մետաքսի բոլոր նմուշները, որ կուտակվել էին վերջին 10 տարում»,-ասել է Նազարյանը:
Ըստ նրա, նա աշխատել է աղբի հետ, որը դիզայներները սովորաբար թափում են:
«Սկզբից հատուկ մկրատով կտրատել եմ շիֆոնի ուղղանկյուն թերթիկները, հետո անհրաժեշտ դասավորությամբ տեղադրել սովորական սպիտակ բամբակից կարված հագուստի վրա: Հետո արդեն դերձակները այդ նույն հաջորդականությամբ կարել են շիֆոնի թերթիկները կտորին»,-ասել է դիզայները: Նազարյանը նշել է, որ երկար ժամանակ տատանվում էր հավաքածուի որոշ տարրեր ստեղծելիս, ուստի մտորումները տևել են 8 ամիս:
«Շիֆոնի թերթիկներով այդ զգեստները սկսել ենք պատրաստել 2016-ի աշնանից՝ ես կասկածում էի, թողնում, չէր ուզում տեսնել, հետո սկսում էի նորից քորոցներով ամրացնել թերթիկները կտորի վրա: Եվ այդպես 8 ամիս շարունակ: Ըստ էության, Փարաջանովն «օգնեց ինձ» զգեստներ ստեղծել այդ աղբից »,-ասել է նա:
Հավաքածուն մարմնագույն, վարդագույն, վառ նարնջագույն երանգներ ունի, համեմված վարդագույն տարրերով, որոնք դիզյաներն ընտրել է՝ ելնելով գերմանացի նկարիչ Պաուլ Կլեեի աշխատանքներից:
Վարդուհի Նազարյանը դպրոցն ավարտել է Հայաստանում, այնուհետև ընդունվել է Մոսկվայի Դիզայնի և տեխնոլոգիաների համալսարան: Իր համանուն Vardoui Nazarian բրենդը նա ստեղծել է 2007-ի դեկտեմբերին, որի համար որպես լոգոտիպ է ընտրել հայկական հեքիաթների հազարան բլբուլը: Դիզայները որպես ոգեշնչման աղբյուր հաճախ է անդրադառնում Հայաստանի եզակի ճարտարապետությանը: