Մոսկվայի մոտակայքի Ալաբինո հրաձգարանում միջազգային բանակային խաղերի շրջանակում հուլիսի 30-ին տեղի է ունեցել տանկային երկամարտի առաջին մրցարշավը, որում հայ տանկիստները գրավել են 2-րդ տեղը:

Տանկային երկամարտի չորրորդ մրցաշրջանում մրցել են Հայաստանի, Վենեսուելայի, Հնդկաստանի ու Նիկարագուայի ներկայացուցիչները։

Առաջինը վերջնագծին են հասել հնդիկ տանկիստները, երկրոդրը՝ հայերը, իսկ երրորդը՝ Վենեսուելայի ներկայացուցիչները։ Նիկարագուայի տանկը վերջինն էր։

Սա մրցաշրջանի նախնական արդյունքներն են․վերջում դատավորները կհաշվեն ժամանակը՝ հաշվի առնելով տուգանային պատժամիջոցները, լրացուցիչ շրջաններն ու կանգառները։

Հայաստանի զինված ուժերը ներկայացել են մի անձնակազմով, որի հրամանատարն էր կրտսեր սերժանտ Արմեն Առուստամյանը։ Հայկական թիմի բոլոր անդամները ժամկետային ծառայող զինվորներ ու սերժանտներ են։

Մրցումները երեք փուլով են անցնում։ Առաջին փուլում՝ անհատական մրցարշավում, մասնակցում են բոլոր թիմերը։ Կիսաեզրափակիչ կանցնի 12 թիմ, իսկ երզափակչում կհանդիպեն չորս լավագույն հավաքականները։

Բոլոր փուլերում տանկիստերը պետք է կրակեն թիրախներին՝ տեղից և ընթացքի մեջ, և հաղթահարեն տարբեր խոչընդոտներ։