Բուքմեյքերական ընկերությունները և խաղատները կարող են տուգանվել 2 մլն դրամով և ավելի, եթե թույլ տան 18 տարին, որոշ դեպքերում նաև՝ 21-ը չբոլորած երիտասարդներին խաղադրույքներ կատարել: Այս մասին իր ֆեյսբուքյան էջում գրում է ՀՀ ԱԺ ՀՀԿ խմբակցության պատգամավոր Սամվել Ֆարմանյանը:
Նա հայտնում է, որ ԱԺ-ում շրջանառության մեջ դրված «Շահումով խաղերի և խաղատների մասին» և «Վիճակախաղերի մասին» ՀՀ օրենքներում փոփոխություններ կատարելու մասին նախագիծը 2 մլն դրամ տուգանք է սահմանում խաղատների և բուքմեյքերական ընկերությունների համար, եթե դրանք առաջին անգամ են խախտում օրենքը:
Իրավախախտումը կրկնելու դեպքում սահմանվում է 5 մլն դրամ տուգանք, երրորդ անգամ՝ 10 մլն դրամ, իսկ չորրորդի դեպքում կասեցվում է ընկերության լիցենզիան:
Գործող օրենսդրությամբ, անչափահասներին խաղադրույքներ անել թույլատրող խաղասրահների և բուքմեյքերական ընկերությունների համար նախատեսվում է 100.000 դրամ տուգանք: