Թուրքիայում 1920-ականներին ազգային փոքրամասնություններին պատկանող 138 գործող դպրոցներից այսօր միայն 24-ն են մնացել: Թուրքական «Հյուրիյեթ» պարբերականի փոխանցմամբ, այդ դպրոցների մեծ մասը գտնվում է ծանր վիճակում և փակվելու վտանգի առաջ է կանգնած:
Պարբերկանի փոխանցմամբ, Թուրքիայում ազգային փոքրամասնությունների հիմնադրամի ղեկավար Թորոս Ալջանը հայտնում է, որ երկրի կրթության և գիտության նախարարությունը էթնիկ փոքրամասնություններին պատկանող դպրոցները դիտարկում է որպես մասնավոր դպրոցներ, ուստի դրանց պետական ֆինանսավորում չի հատկացվում: «Այս դպրոցներն ունեն հասարակական կազմակերպությունների կարգավիճակ, և դրանց գոյության միակ հույսը նվիրատվություններն են»,- «Հյուրիյեթ»-ին ասել է Ալջանը:
«Թուրքիայում այսօր 60.000 հայ է ապրում: Եթե 1950-ականների վերջին հայերն ունեին 25 դպրոց և 9.000 աշակերտ, ապա այսօր հայկական դպրոցների թիվը 16 է, իսկ այստեղ սովորող աշակերտներինը՝ 3000»,-պարբերականին ասել է Հայկական Դադյան դպրոցի հիմնադիր խորհրդի նախկին անդամ Արսեն Արշըքը:
Նա հավելել է նաև, որ երկրի կրթական ոլորտում փոփոխությունների հետևանքով մի շարք առարկաների քննությունները դարձել են կենտրոնացված, և հայ աշակերտները զրկվել են մայրենիով այդ քննությունները հանձնելու իրավունքից: