Հայաստանը 2017-ին 2016-ի համեմատ 33 կետով նահանջել է «Ահաբեկչության համաշխարհային ինդեքս» վարկանիշում: Համաձայն Էկոնոմիկայի և խաղաղության ինստիտուտի հրապարակած հետազոտության՝ ընթացիկ տարում Հայաստանը 75-րդ տեղում է 163 երկրների շարքում՝ նախորդ տարվա 108-ի փոխարեն:

Հայաստանում ահաբեկչության վտանգը առավելագույն 10 միավորից գնահատվել է 2,374 միավոր, 2016-ին՝ 2,086 միավոր: Վարկանիշում Վրաստանը 77-րդ տեղն է զբաղեցրել, Ադրբեջանը՝ 95-րդն է, Թուրքիան՝ 9-րդը, Իրանը՝ 53-րդը, և Ռուսաստանը՝ 33-րդը:

Ահաբեկչության ամենաբարձր սպառնալիք ունեցող երկրներն են Իրաքը, Աֆղանստանը, Նիգերիան, Սիրիան, Պակիստանը, Եմենը, Սոմալին, Հնդկաստանը, Թուրքիան և Լիբիան:

Հետազոտության համաձայն՝ 2016-ին ահաբեկիչների գործողությունների հետևանքով ավելի քան 25.600 մարդ է զոհվել աշխարհի 77 երկրում, ինչը 13%-ով քիչ է 2015-ի ցուցանիշից: Վարկանիշը կազմելիս հաշվի է առնվել յուրաքանչյուր երկրում տարվա ընթացքում ահաբեկչությունների, զոհերի և տուժածների թիվը, ինչպես նաև ավերածությունների ծավալը: