«Ռոսսիա» ավիաընկերության Կանկուն-Մոսկվա չարթերային չվերթը հետաձգվել է՝ կապված Հայաստանի 4 քաղաքացու վտարման վերաբերյալ Մեքսիկայի միգրացիոն վերահսկողության ծառայության պահանջի հետ: Այս մասին գրում է ռուսաստանյան «ՏԱՍՍ» գործակալությունը:
Հայտնի է, որ հետաձգված թռիչքը, որի պատճառով ռուս զբոսաշրջիկները չեն կարողանում լքել Մեքսիկան, կիրականացվի հունվարի 17-ին ժամը 21:00-ից ոչ շուտ:
«Թռիչքի համար թույլտվություն ինքնաթիռը կստանա միայն այն բանից հետո, երբ Մեքսիկայի ավիացիոն իշխանության համար սկսվի աշխատանքային օրը»,- հայտնել են ավիաընկերությունից:
Ավելի վաղ լուրեր էին տարածվել, որ չվերթի հետաձգումը կապված է Կանկուն օդանավակայանին «Ռոսսիա» ավիաընկերության պարտքերի հետ: Սակայն այդ լուրերը հերքվել են ավիաընկերության կողմից: