Մարտի 5-ի երեկոյան «Մոսկվա» կինոթատրոնում տեղի է ունեցել «Ժխտման ճարտարապետները» վավերագրական ֆիլմի պրեմիերան: Ներկա են եղել ՀՀ նախագահ Սերժ Սարգսյանը և առաջին տիկին Ռիտա Սարգսյանը:
Վավերագրական ֆիլմը հիմնված է պատմաբանների ուսումնասիրությունների և ցեղասպանությունից փրկվածների պատմությունների վրա: Ֆիլմում ներառված են փորձագետների վկայություններ, ովքեր ներկայացնում են պատմության «ժխտողականության» կապն աշխարհի տարբեր անկյուններում ներկայումս տեղի ունեցող էթնիկ զտումների և մարդկության դեմ հանցագործությունների հետ:
Պրեմիերային ներկայացնելով ֆիլմը՝ ՀՀ արտգործնախարար Էդվարդ Նալբանդյանն ասել է. «Այսօր Հայաստանի հանդիսատեսին է ներկայացվում «Ժխտման ճարտարապետները» ֆիլմը, որն արդեն հասցրել է լայն ընդունելության արժանանալ Ամերիկայի Միացյալ Նահանագներում և շատ այլ երկրներում։ Ֆիլմը նվիրված է 20-րդ դարասկզբին տեղի ուենցած մարդկության դեմ զարհուրելի հանցագործությանը՝ Հայոց ցեղասպանությանը, դրա ժխտման շարունակական փորձերին, ինչպես նաև մեր օրերում իրականացված ոճրագործություններին:
Ինչպես ասում էր Հոլոքոսթը վերապրած Նոբելյան մրցանակակիր Էլի Վիզելը` ժխտել նշանակում է երկրորդ անգամ սպանել։ Նա կոչ էր անում չլռել, պայքարել ցեղասպանության չարիքի դեմ, քանի որ անտարբերությունը, ժխտողականությունը նոր դահիճներ են ծնում: Հիրավի ֆիլմի հեղինակները մեծ ու շնորհակալ աշխատանք են իրականացրել, այս տպավորիչ ստեղծագործության միջոցով ևս մեկ անգամ բարձրաձայնելով. «ոչ ոք չի մոռացել, ոչինչ չի մոռացվի», հայտնում է ԱԳՆ մամուլի ծառայությունը:
Նա նշել է, որ ֆիլմը կարևոր քայլ է, ինչպես Հայոց ցեղասպանության միջազգային ճանաչման ու իրազեկվածության բարձրացման, այնպես էլ ցեղասպանությունների, ժխտողականության չարիքի դեմ պայքարում: Այն նշանակալի խթան է «այլևս երբեք»-ի խոստումն իրականացնելու համամարդկային ջանքերում:
«Շնորհակալություն բոլոր նրանց, ովքեր իրենց ներդրումն են ունեցել այս արժեքավոր ֆիլմի ստեղծման գործում։ Այսօր Ֆիլմի ստեղծագործական խումբը ներկա է հայաստանյան պրեմիերային։ Մեզ հետ են ֆիլիմի պրոդյուսերները` ամերիկյան կինոարվեստի և հեռուստատեսության աստղեր Դին Քեյնն ու Մոնթել Ուիլիամսը, կխնդրեի ողջունել նրանց»:
Ֆիլմը նկարահանվել է Գլենդելում «Հայ դատի» հանձանախմբի (ANCA) նախաձեռնությամբ: Ֆիլմի հեղինակները ամերիկացի դերասան Դին Քեյնն ու հեռուստահաղորդավաոր Մոնթել Ուիլյամն են: Ուիլյամը մտահոգվել է, երբ ստացել է ֆիլմի նկարահանման առաջարկը, քանի որ այդ ժամանակ առաջին անգամ է լսել Հայոց ցեղասպանության մասին: Ըստ նրա՝ ֆիլմը պետք է իրազեկման միջոց դառնա:
«Հայոց ցեղասպանության 100-ամյա ժխտողականությունը այն միակ պատճառն է, որի համար մարդիկ անտեսում են մյուս բոլոր ցեղասպանությունները, որոնք շարունակում են տեղի ունենալ հենց այս պահին: Մենք միայն շշուկներ ենք լսում, քանի որ աշխարհը նախընտրում է չբարձրաձայնել այս իրողությունների մասին»,-ասել է հեռուստահաղորդավարը:
