Երկրապահ կամավորական միությունն ակտիվ պահեստազորի բանակումների համար մոտ 20 տարի օրինական կարգով ապրանքներ է ստացել պաշտպանության նախարարությունից: Այս մասին լրագրողների հետ զրույցում ասել է ՀՀ պաշտպանության նախարարի մամուլի քարտուղար Արծրուն Հովհաննիսյանը՝ անդրադառնալով ԱԺ «Հանրապետական» պատգամավոր Մանվել Գրիգորյանի գործին:

Նա ասել է նաև, որ պաշտպանության նախարարությունը չի ունեցել վերահսկելու մեխանիզմներ, որ այդ ապրանքները «իրենց նպատակին ծայառեն»: Ըստ Հովհաննիսյանի, Ապրիլյան պատերազմի օրերին կառույցը զինվորների համար հավաքված օգնությունն առաջնագիծ մատակարարողի դեր է ստանձնել:

Կառավարությունը որոշել է ԱԺ արտահերթ նիստ գումարել հունիսի 19-ին՝ ժամը 11:00-ին, որի ընթացքում կքննարկվի ԱԺ «Հանրապետական» խմբակցության պատգամավոր Մանվել Գրիգորյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու մասին Հայաստանի Հանրապետության գլխավոր դատախազի միջնորդագիրը:

Հունիսի 17-ի երեկոյան ԱԱԾ-ն հրապարակել է Մանվել Գրիգորյանին պատկանող առանձնատանն ու ամառանոցում խուզարկության տեսագրությունը․ մեծ քանակությամբ զենք-զինամթերքից բացի, առգրավվել է հսկայական քանակի բանակին պատկանող գույք ու սնունդ, Ապրիլյան պատերազմի ժամանակ դպրոցականների, եկեղեցու ու քաղաքացիների կողմից բանակ ուղարկած օգնություն, որն օգտագործվել էր Գրիգորյանի կենդանիներին կերակրելու համար, ինչպես նաև՝ բանակին նվիրաբերած ավտոմեքենաներ։