Հունիսի 26-ին Բաքվում կայացած ադրբեջանական ԶՈւ 100-ամյակին նվիրված ռազմական զորահանդեսի ընթացքում առաջին անգամ ցուցադրվել է իսրայելական արտադրության Heron անօդաչու թռչող սարք:
Israel Aerospace Industries ընկերության արտադրած ԱԹՍ-ն նախատեսված է հետախուզական տվյալների հավաքման և փոխանցման համար:
2016 թվականի «Զենքի համաշխարհային առևտրի վերլուծության կենտրոնի» տվյալների համաձայն, Ադրբեջանը Իսրայելից գնել է Heron-1 տիպի 16 սարք $300 մլն-ով, այս տվյալները ոչ պաշտոնապես հաստատվել են նախկինում, սակայն սարքը պաշտոնապես ցուցադրվել է առաջին անգամ:
2007 թվականին Իսրայելն ու Ադրբեջանը $1,6 մլրդ-ի զենքի մատակարարման պայմանագիր են կնքել: Բացի անօդաչուներից, Իսրայելը մատակարարում է Ադրբեջանին ռադարներ, հակատանկային հրթիռներ, ականանետեր, գիշերային տեսանելիության սարքեր, այլ ռազմական պարագաներ: