Թուրքիայի նախագահ Ռեջեփ Թայիփ Էրդողանի մամուլի քարտուղար Իբրահիմ Քալինն Անկարայում գտնվող ԱՄՆ նախագահի ազգային անվտանգության գծով խորհրդական Ջոն Բոլթոնի հետ քննարկել է Սիրիայում ամերիկյան ռազմակայանների ապագայի հարցը՝ այդ երկրից ԱՄՆ զորքերի հեռանալուց հետո:
Ըստ Hurriyet-ի, Բոլթոնի հետ բանակցություններում Թուրքիան հարցում է ուղղել Վաշինգտոնին՝ Սիրիայում գործող ամերիկյան ռազմակայաններն Անկարային փոխանցելու կամ դրանք ոչնչացնելու վերաբերյալ, հայտնում է ՌԻԱ Նովոստին:
Բոլթոնն Անկարայում բանակցել է Քալինի հետ պատվիրակությունների կազմում: Նախապես հայտարարված համատեղ մամուլի ասուլիսը չեղարկվել է:
«Մենք ուրախ ենք, որ ԱՄՆ-ն որոշել է դուրս բերել իր զորքերը Սիրիայից, բայց ինչպես է դա տեղի ունենալու, ի՞նչ է լինելու Սիրիայում ԱՄՆ ռազմակայանների հետ: Դրանց ճակատագիրը, ինչպես նաև այլ հարցեր, պետք է լուծել, և այսօր մենք դա բազմակողմանի քննարկել ենք: Մեր զինվորականները շարունակում են երկկողմ բանակցությունները, բայց կա մի քանի կարևոր սկզբունք՝ առաջին հերթին քաղաքական միասնությունն ու Սիրիայի տարածքային ամբողջականությունը»,-ասել է Քալինը լրագրողներին:
Ըստ նրա, հարկավոր է մաքրել Սիրիան ահաբեկչական խմբավորումներից և «այս հարցում կանգ առնել չի կարելի»:
2018-ի դեկտեմբերի կեսին ԱՄՆ նախագահ Դոնալդ Թրամփը հայտարարեց Սիրիայում ԻՊ հանդեպ հաղթանակի մասին՝ հայտարարելով, որ դա ամերիկացի զինվորականների ներկայության միակ ապտճառն էր այդ երկրում: Ավելի ուշ Սպիտակ տան մամուլի քարտուղար Սարա Սանդերսը հայտնեց, որ ԱՄՆ-ն սկսել է դուրս բերել զորքերը Սիրիայից, սակայն, հաղթանակը ԻՊ հանդեպ, չի նշանակում կոալիցիայի փլուզում: