ՌԴ արտաքին գործերի նախարար Սերգեյ Լավրովը հուսով է, որ Ադրբեջանում 2016-ին կալանավորված ՌԴ հայազգի քաղաքացի Մարատ Ուելդանով-Գալուստյանին Ռուսաստան վերադարձնելու հարցը հնարավոր կլինի լուծել երկխոսության միջոցով:
2018-ի ամփոփմանը նվիրված մեծ մամուլի ասուլիսում Լավրովն ասել է, որ այլ պետություններում, այդ թվում ԱՊՀ երկրներում, բարդ իրավիճակում հայտնված ՌԴ քաղաքացիներին առնչվող հարցերը ՌԴ ԱԳՆ-ն մշտապես արծարծում է երկկողմ շփումների ժամանակ:
«Ուզում եմ հավաստիացնել, որ նաև այդ կոնկրետ թեման հնչել է մեր ադրբեջանցի գործընկերների հետ վերջին բանակցությունների ժամանակ: Հուսով եմ, որ մենք կկարողանանք երկխոսության և իրավական նորմերի վրա հիմնված լուծումների միջոցով գտնել բոլորին գոհացնող լուծում և վերադարձնել այդ քաղաքացուն Ռուսաստան»,-ասել է Լավրովը, հայտնում է ՏԱՍՍ-ը:
Մարատ Ուելդանով-Գալուստյանը ձերբակալվել է Բաքվում 2016-ի հուլիսին: Նրան մեղադրում են խոշոր չափերի թմրամիջոցներ ձեռք բերելու, արտադրելու, պահելու և տարածելու մեջ:
