Ռուսաստանի նախագահ Վլադիմիր Պուտինի հունվարի 25-ի աշխատանքային օրակարգում ՀՀ վարչապետ Նիկոլ Փաշինյանի հետ հանդիպում առայժմ չկա: Այդ մասին հայտնել է ՌԴ նախագահի մամուլի քարտուղար Դմիտրի Պեսկովը:

Ավելի վաղ հայտնի դարձավ, որ Նիկոլ Փաշինյանը հունվարի 24-ին աշխատանքային այցով կմեկնի Մոսկվա:

«Որքան գիտեմ, ՌԴ նախագահի հետ բանակցություններ չեն նախատեսվում: Դուք գիտեք, որ նրանք հաճախ են շփվում, և հեռախոսով, և շատ հաճախ հանդիպում են: Ուրբաթը բավականին հագեցած օր է նախագահի համար, ուստի չգիտեմ, կլինեն արդյոք ինչ-որ փոփոխություններ, առայժմ նման շփումներ չեն համաձայնեցվել»,-ասել է Պեսկովը, հայտնում է ՌԻԱ Նվոոստին:

Վարչապետ Փաշինյանը կայցելի Եվրասիական տնտեսական հանձնաժողովի Մոսկվայի կենտրոնակայան և հանդես կգա ելույթով՝ Եվրասիական տնտեսական միության (ԵՏՄ) բարձրագույն մարմիններում Հայաստանի նախագահության առաջնահերթությունների վերաբերյալ, հայտնում է կառավարության տեղեկատվության և հասարակայնության հետ կապերի վարչությունը։