2019 թ. մայիսի 7-8-ը Հայաստանում շախմատային կրթությանը նվիրված միջազգային կոնֆերանս կանցկացվի:
Կազմակերպիչներն են Շախմատի միջազգային ֆեդերացիայի շախմատը կրթական համակարգում հանձնաժողովը և Խ. Աբովյանի անվան Հայաստանի պետական մանկավարժական համալսարանի «Շախմատ» գիտահետազոտական ինստիտուտը, հայտնում է Հայաստանի շախմատի ֆեդերացիայի պաշտոնական կայքը:
Կոնֆերանսը կրում է «Շախմատային կրթության արդի վիճակը և զարգացման միտումները» խորագիրը:
Ավելի վաղ ՀՀ ԿԳ նախարար Արայիկ Հարությունյանը հայտարարել էր, որ դեռևս հայտնի չէ՝ շախմատը կշարունակվի դասավանդվել դպրոցում, թե ոչ: «Ծնողների կողմից կան բողոքներ այս առումով ու քննարկվող առարկաների մեջ նաև շախմատը կլինի՝ բոլոր առարկաները կլինեն: Բոլորի ծրագրերը փոխվելու են», - ասել էր նա:
2011-ին Հայաստանն առաջինը աշխարհում շախմատը որպես պարտադիր առարկա ներդրեց դպրոցներում՝ տարրական դպրոցի 2-4-րդ դասարաններում: