BBC-ի ռուսաստանյան ծառայությունն անդրադարձել է Ադրբեջանի նախագահ Իլհամ Ալիևի կողմից երկրում նախաձեռնած քաղաքական և սոցիալ-տնտեսական բարեփոխումների իմիտացիային:
Թվարկելով առերևույթ բարեփոխումների պատճառները՝ հեղինակն առանձնացրել է տարածաշրջանային գործընթացների, մասնավորապես՝ Հայաստանում ապրիլյան իրադարձությունների ազդեցությունը:
«Հայաստանում Թավշյա հեղափոխությունը և իշխանափոխությունը ծանր դրության մեջ են գցել Բաքվին, որտեղ ամենաքիչն էին սպասում այդպիսի զարգացումների հարևան երկրում՝ հաշվի առնելով Ռուսաստանի Դաշնությունից Երևանի ուժեղ կախվածության հանգամանքը», - նշված է հրապարակման մեջ:
Նշվում է նաև, որ Հարավային Կովկասի երկրների քաղաքականության մեջ նախկինի պես կարևոր գործոն է տարածաշրջանում առաջինը լինելու և Արևմուտքի աչքում «կարևոր գործընկերոջ» դերը ստանձնելու մրցակցությունը:
«Եթե նախկինում Ադրբեջանն իրեն համարում էր Հարավային Կովկասի առաջատարն Արևմուտքի անվտանգության շահերի (առաջին հերթին նավթային և կոմունիկացիոն) սպասարկման տեսանկյունից, ապա ներկայում՝ նավթի համաշխարհային շուկայում իրավիճակի փոփոխության պայմաններում, էներգետիկ նախագծերը կորցրել են իրենց կարևորությունը: Դա նշանակում է, որ արտաքին գործոնների կարևորությունը իշխանության լեգիտիմության մեջ թուլանում է, և երկրի առաջնորդը ստիպված է դիմել հասարակությանը՝ իր իշխանությունն ամրապնդելու համար», - նշված է հրապարակման մեջ:
Նշվում է, որ ներքին աջակցությունը կարևոր է Ադրբեջանի համար նաև այն պատճառով, որ դա «անմիջականորեն կանդրադառնա Ադրբեջանի անվտանգության ամենակարևոր խնդրի՝ Ղարաբաղյան հակամարտության կարգավորման վրա»:
