50-ամյա Վյաչեսլավ Հարությունովին ծեծելու մեջ մեղադրվող ՀՀ ԱԺ «Բարգավաճ Հայաստան» խմբակցության պատգամավոր Էդուարդ Բաբայանը լրագրողների հետ զրույցում ասել է, որ ինքը «երբեք մարդ չի ծեծել», հայտնել է «Ազատությունը»:
Հատուկ քննչական ծառայությունում պատգամավոր Բաբայանի նկատմամբ հարուցված քրեական գործը մեղադրական եզրակացությամբ ուղարկվել էր դատախազություն:
2018 թվականին հարուցված քրեական գործի շրջանակում Էդուարդ Բաբայանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով նախատեսված այն հանցավոր արարքի կատարման համար, որ վերջինս խմբի կազմում հարվածներ է հասցրել և դիտավորությամբ կյանքին վտանգ սպառնացող ծանր վնասվածք է հասցրել Վյաչեսլավ Հարությունովին:
Դեպքից անմիջապես հետո Վյաչեսլավ Հարությունովը հաղորդում էր տվել հանցագործության մասին, իսկ որոշ ժամանակ անց հերքել է իր տված ցուցմունքը՝ ասելով, որ պարզապես սայթաքել և ընկել է: