Իրաքում Տիգրիս գետի վրա լաստանավի վթարից առնվազն 93 մարդ է զոհվել: Իրաքի վարչապետ Ադել Աբդել Մահդին եռօրյա ազգային սուգ է հայտարարել:

Ուզևորատար լաստանավը շրջվել է Իրաքի Մոսուլ քաղաքից ոչ հեռու մարտի 21-ին: Ըստ Մահդիի, որը ժամանել էր ողբերգության վայր, 55 մարդու հաջողվել է փրկել, գրում է Deutsche Welle-ն «Ռուդաու» ալիքի վրա հղումով:

Հավանաբար, ողբերգության պատճառ է դարձել փոխադրամիջոցի գերբեռնվածությունը, նշում է AFP-ն: Լաստանավի վրա մոտ 100 մարդ կար, հիմնականում ընտանիքներ երեխաների հետ: Շատերը մեկնում էին նշելու Նովրուզը:

Մոսուլը 3 տարի եղել է ահաբեկչական «Իսլամական պետության» հսկողության տակ: Քաղաքն ազատագրվել է 2017-ի հուլիսին: