ՀՀ ԱԺ նախագահ Արարատ Միրզոյանը լրագրողների հետ զրույցում անդրադարձել է Արցախի Հանրապետության Անվտանգության խորհրդի քարտուղար Վիտալի Բալասանյանի հայտարարությանը:
«Ընդհանրապես, այս և պարոն Բալասանյանի մյուս հայտարարությունների մասով կոչ կանեի, որ տեսախցիկների առաջ հնչած հայտարարությունները համապատասխանեին առանց տեսախցիկների արվող հավաստիացումներին», - ասել է Միրզոյանը:
Նա նաև նշել է, որ հասկանում է՝ Արցախում մեկնարկել է նախընտարական շրջանը:
«Կառաջարկեի, որ մեր գործընկներն առաջ չընկնեին իրադարձություններից», - ասել է Միրզոյանը:
ՀՀ ԱԺ-ում գտնովղ Արցախի Հանրապետության օրենսդիր մարմնի ղեկավար Աշոտ Ղուլյանն էլ իր հերթին նշել է, որ որևէ հակասություն կողմերի միջև չկա, ՀՀ ու Արցախի «հարաբերությունների մեջ չկա սրացում»:
«Կարևոր է հասկանալ՝ մարդիկ կարող են ունենալ մասնավոր կարծիքներ: Սա էլ է մեր նոր ժամանակների արդյունքը, երբ ամեն մարդ ազատ է իր տեսակետը ներկայացնելու համար, բայց դրա համար նաև հետևանքներ էլ կան», - ասել է նա:
Ավելի վաղ Արցախի Անվտանգության խորհրդի քարտուղար Վիտալի Բալասանյանը նշել էր, Արցախի հանրապետության նախագահ Բակո Սահակյանի և նախկին նախագահ Արկադի Ղուկասյանի դիմումները՝ Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանի խափանման միջոց կալանքը փոխելու մասին պետք է հարգվեր ՀՀ-ի կողմից:
