Ֆրանսիայի ազգային ժանդարմերիայի աշխատակիցներն արցունքաբեր գազ են կիրառել Ելիսեյան դաշտերում ցուցարարներին ցրելու համար: Դա տեղի է ունեցել հուլիսի 14-ին Փարիզում երկրի ազգային տոնի՝ Բաստիլի գրավման օրվա կապակցությամբ կայացած զորահանդեսից մի քանի ժամ անց:

Երթի ավարտից անմիջապես հետո, քաղաքի կենտրոնական մայրուղիներից մեկը կրկին բացվել էր տրանսպորտի երթևեկության համար, սակայն մի քանի հարյուր մարդ չէր ցանկանում ցրվել: Նրանք սկսել են հակակառավարական կարգախոսներ հնչեցնել, քանդել մետաղյա պատնեշները, որոնք տեղադրվել էին երթի պարագծով, և հրկիզել աղբամանները: Այդ պատճառով պողոտայի առանձին հատվածներ ծածկվեցին ծխով, գրում է Deutsche Welle-ն AFP-ի վրա հղումով:

Կարելի է խոսել մարտից ի վեր, երբ բողոքում էին «դեղին բաճկանները», Փարիզում ամենալայնածավալ բռնության մասին: Այս անգամ, սակայն, հավաքվածների մեջ «դեղին բաճկոններ» չկային, քանի որ այդ հագուստով մարդկանց թույլ չէին տալիս մասնակցել շքերթին, սակայն, ոմանք դեղին օդապարիկներ էին բերել:

Ինչպես հայտնել է ոստիկանության վրա հղումով BFMTV հեռուստաալիքը, ընդհանուր առմամբ բերման է ենթարկվել 152 մարդ: Մասնավորապես, նրանց մեղադրում են արգելված զենք կրելու, իշխանության մարմինների ներկայացուցիչների հանդեպ բռնություն ձեռնարկելու, գույքը վնասելու մեջ: