Հայաստանի կինոթատրոններում սեանսների տոմսերն ավելի թանկ են, քան հարևան Վրաստանում և Ադրբեջանում: Այդ են վկայում Picodi.com-ի ամռան շրջանում արված հետազոտությունները:

Ռեսուրսը վերլուծել է, թե որքանով են տարբերվում 2D և 3D սեանսների գները աշխատանքային և հանգստյան օրերին Եվրոպայի, Ասիայի, G20-ի և այլ երկրների կինոթատրոններում:

Հայաստանում կինոյի տոմսի միջին արժեքը մոտ 5,2 դոլար է, Վրաստանում՝ 5 դոլար, Ադրբեջանում՝ 3,8 դոլար: Ուսումնասիրված երկրներում 3D սեանսի տոմսի արժեքը 2D-ից միջինը թանկ է ակնոցների գնի չափով, որը կարող է կազմել ստանդարտ տոմսի արժեքի 10-25%-ը: Նման իրավիճակ է բազում երկրներում, այդ թվում Վրաստանում, Ճապոնիայում, եվրոյի գոտու որոշ երկրներում:

Հայաստանում, սակայն, 3D սեանսի տոմսի արժեքը գերազանցում է 2D-ի արժեքը 60%-ով: Դա ամենամեծ խզումն է բոլոր այն երկրներից, որտեղ կատարվել է հետազոտությունը:

Տոմսերի գների նվազագույն տարբերությունը գրանցվել է Ֆինլանդիայում (7%), Սաուդյան Արաբիայում և Սլովակիայում (6%), Սինգապուրում(3%): Տաջիկստանում և Ուզբեկստանում, էկրանին սիրելի հերոսին «շավալուն» տեսնելու համար, որոշ կինոկենտրոններում, հարկ է ընդամենը 4-6% ավելի վճարել: Բացի այդ, հանգստյան օրերին տոմսերի գները ևս տարբերվում են: Այդպես, Հայաստանում աշխատանքային օրերին տոմսերի արժեքը միջինը մոտ 4,2 դոլար է, իսկ ուրբաթ, շաբաթ և կիրակի օրերին այդ գնին ավելանում է արժեքի ևս 25%-ը:

Տոմսերի արժեքը համեմատվել է ըստ տվյալների, որոնք հասանելի են համացանցում՝ կինոթատրոնների պաշտոնական կայքէջերում: Ուսումնասիրությունից դուրս են մնացել թանգարանային և ոչ ռեպերտուարային ցուցադրությամբ կինոթատրոնները, ինչպես նաև պրոմո-ակցիաները: Օգտագործվել են արժույթների փոխարժեքի պաշտոնական ցուցանիշները 2019-ի հուլիսին: