14 հոկտեմբերի 2019 - 10:27 AMT
Սիրիայի կառավարական զորքերն օգնության են գնում քրդերին

Սիրիայի կառավարական զորքերը օգնության են գնում քրդերին՝ «թուրքական ագրեսիային հակազդելու համար», և մտադիր են 48 ժամում արդեն լինել գործողության վայրում: Այդ մասին հայտարարել է Sana կառավարական հեռուստաալիքը, դա արմատապես փոխում է իրավիճակը հակամարտության գոտում, գրում է «Կոմերսանտը»:

Հոկտեմբերի 13-ին թուրքական զորքերը զգալիորեն ամրապնդել են իրենց դիրքերը Սիրիայում՝ հսկողության տակ վերցնելով մոտ 30 կմ երկարությամբ մայրուղու հատվածը: Դա թուրքերի սկսած «Խաղաղության աղբյուր» գործողության հաջողության մասին էր վկայում՝ Թուրքիայի նախագահ Ռեջեփ Թայիփ Էրդողանը հայտարարել է Ռաս էլ Այնն ու Թել Աբյադը հսկողության տակ առնելու մասին: Ավելի ուշ հայտարարվեց, որ թուրքական զորքերը գրավել են Թել Աբյադը:

Ավելի ուշ հայտնի դարձավ, որ սիրիական բանակը մտել է քրդերի կողմից վերահսկվող Տաբակա քաղաքը Ռաքքայի գավառում և շարունակում է շարժվել դեպի հյուսիս: Այդ մասին հայտնել է լիբանանյան al-Mayadeen-ը, սակայն պաշտոնական Դամասկոսը հայտարարություն դեռ չի արել, գրում է ՌԻԱ Նովոստին:

Հոկտեմբերի 9-ին Թուրքիան հայտարարել էր Սիրիայում ռազմական գործողության մեկնարկի մասին, որի արդյունքում երկիրն արդեն հարվածներ է հասցրել սիրիական Թել Աբյադ և Ռաս էլ Այն քաղաքներին: Թուրքիայի ազգային պաշտպանության նախարարությունը հայտարարել է, որ Թուրքիայի ԶՈՒ-ն և «Սիրիայի ազատ բանակ» ընդդիմադիր խմբավորումը «Խաղաղության ակունք» գործողության շրջանակում ցամաքային հարձակում են սկսել Եփրատ գետի արևելքում: