ՀՀ 3-րդ նախագահ, ՀՀԿ նախագահ Սերժ Սարգսյանը մասնակցել է նոյեմբերի 8-10-ը Ծաղկաձորում տեղի ունեցած ՀՀԿ կողմից կազմակերպված «Պոպուլիզմը և ավանդական քաղաքականությունը. Մարտահրավերներ և լուծումներ» աշխատաժողովին, որն իրականացվել է «Կոնրադ Ադենաուեր» հիմնադրամի աջակցությամբ։
Նա հանդես է եկել բացման խոսքով, հայտնում է ՀՀԿ գրասենյակը։
Նշվում է, որ աշխատաժողովը համախմբել է ՀՀԿ տարբեր կառույցների ներկայացուցիչների։ Մասնակիցները քննարկել են կուսակցական աշխատանքի կազմակերպման նոր մարտահրավերները, ամբոխավարական քաղաքական օրակարգի պարագայում գաղափարական քաղաքական միավորների գործունեության առանձնահատկությունները, կանանց եւ երիտասարդների դերակատարումը կուսակցական քաղաքականության մեջ և այլ թեմաներ։
Անդրադարձ է կատարվել արտաքին և ներքաղաքական օրակարգերի փոխկապակցված հիմնախնդիրներին, մարդու իրավունքների արդի վիճակին, տնտեսական ցուցանիշների դինամիկային և մամուլի ազատությանը։
Աշխատաժողովի մասնակիցներին ներկայացվել են նաև մի շարք սոցիոլոգիական հարցումների արդյունքներ, զեկույցներով հանդես են եկել տարբեր ոլորտների առաջատար փորձագետներ և հասարական կառույցների ներկայացուցիչներ։
«Կարևորվել են հիմնական աշխատանքային առաջնահերթությունները և տրվել ոլորտային հանձնարարականներ»,-ասված է հայտարարության մեջ:
