ՀՀ ընտանեկան օրենսգրքում լրացում կատարելու օրենքի նախագծի համահեղինակ, ԲՀԿ պատգամավոր Գևորգ Պետրոսյանը ԱԺ նիստի ժամանակ, խոսելով նախագծի մասին, ասել է, թե այն վերաբերում է «նույնասեռականների և սեռափոխված անձանց» կողմից երեխա որդեգրելու արգելքին, ապա հարցրել պատգամավորներին` կուզեին իրենց ընտանքիներում «նմանտիպ երևույթ» լիներ:
Հարցին արձագանքել է ԱԺ նախագահ Արարատ Միրզոյանը՝ ասելով, թե Պետրոսյանն անձնավորված ելույթ է ունենում: «Ի՞նչ անձնավորված բաներ է, մի հատ էլ «քֆուր դնեիք», ով որ քվեարկելու է: Ձեր ձևը արդեն չափ ու սահման չունի»,-ասել է Միրզոյանը Պետրոսյանին՝ կոչ անելով ձայնից զրկելու հոդվածը գտնել:
Գևորգ Պետրոսյանն իր ելույթում ասել է, թե անհրաժեշտ է պահել հայկական արժեքները:
«Եթե մարդը նույնասեռական է, լավ իսկապես եկեք էդ արժեքները պահենք, մենք նահապետական ժողովուրդ ենք, քաղաքակրթության օրրանը Հայաստանն է, մենք ամենաավանդապաշտ ազգն ենք: Հիմա էդ ինչու՞ ենք մոռացել էդ ամեն ինչը, մենք չենք ասում՝ իրանց սպանեք, մենք ասում ենք՝ եկեք նման մարդկանց կողմից երեխա որդեգրելու ուղղակի արգելք սահմանենք: Լավ, արդեն հասանք նրան, որ այդտեղ էլ պետք է նահանջենք»,- ասել է պատգամավորը՝ հավելելով, որ նախագծի բացակայությունը ոչ իր անձին է սպառնում, ոչ էլ պատգամավորներից շատերին, բայց դա ազգային անվտանգության հարց է:
Օրենքի նախագիծը չընդունվեց, հաջորդող ելույթներում պատգամավորներն ընդգծեցին, որ ՀՀ օրենսդրությունն արդեն նման արգելք սահմանում է:
