ՀՀ վարչապետ Նիկոլ Փաշինյանը Միլանում, Հայ Առաքելական Սուրբ քառասուն մանկունք եկեղեցում հայ համայնքի ներկայացուցիչների հետ հանդիպմանը, հայտարարել է, որ ինքը սեր է քարոզում, ինչպես Հիսուս Քրիստոսը, սակայն նույնիսկ Հիսուս Քրիստոսը մտավ տաճար և շուռ տվեց այն սեղանները, որտեղ պղծվում էին սրբությունները:
Վարչապետն, անդրադառնալով հանդիպման ժամանակ մի կին գիտնականի կողմից հնեչցված իր հրաժարականի պահանջին և ատելության քարոզի մասին դիտարկմանը, հավելել է նաև, որ քանի դեռ ունի Հայաստանի ժողովրդի վստահությունը, կարիք չունի հրաժարականի մասին մտածելու:
«Երբ չունենամ ժողովրդի վստահությունը, որևէ մեկին չեմ թողնի, որ նույնիսկ ակնարկի դրա մասին՝ րոպե առաջ, դա կանեմ, քանի որ վարչապետը, որը չունի ժողովրդի վստահությունը, անկախ անձերից, չարիք է երկրի համար...ինչպես, կներեք, չարիք են եղել երկրի բոլոր ղեկավարները՝ սկսած 1996 թվականից, երբ առանց ժողովրդի վստահության, տիրացել են իշխանությանը և փորձել են պահել այդ իշխանությունը: Մեր օրերում այդպիսի իշխանություն և այդպիսի իրավիճակ չի լինելու»,– ասել է նա:
Միլանի Հայ Առաքելական Սուրբ Քառասուն Մանկունք եկեղեցում հայ համայնքի ներկայացուցիչների հետ հանդիպմանը, հայ համայնքի ներկայացուցիչը, ներկայանալով որպես գիտնական, ով աշխատում է Միլանի Եվրոպական ուռուցքաբանության ինստիտուտում և դիմելով ՀՀ վարչապետ Նիկոլ Փաշինյանին, ասել է. «Ես կոչ եմ անում, որ Ձեր կառավարությունը և Դուք անձամբ հրաժարական տաք: Դա ամենամեծ բանն է, որ Դուք կարող եք անել Հայաստանի համար»:
Հանդիպումից հետո վարչապետը պատասխանել է մի շարք հարցերի, որոնք վերաբերում էին Հայաստանում իրականացվող բարեփոխումներին, զարգացման ծրագրերին, ներքին և արտաքին քաղաքականությանը և այլն։Հանդիպման ավարտին ՀՀ վարչապետը իտալահայ գրող, գիտնական Անտոնիա Արսլանին հանձնել է ՀՀ սփյուռքի նախարարության ոսկե մեդալ և բարձր գնահատել նրա ներդրումը և գործունեությունը գիտակրթական ոլորտում:
