Հանրահայտ «Կեր, աղոթիր, սիրիր» ֆիլմի անվանումը Հայաստանում զբոսաշրջիկի գործողությունների իդեալական պլան է, գրում է ՌԻԱ Նովոստի գործակալությունը Հայաստանին նվիրված հոդվածում: Ըստ հեղինակի, հոդվածն այն մասին,է, թե ինչպես գտնել Ֆրանսիան Երևանում, ուր այցելեն բնության սիրահարները և ուր գնան ճարտարապետությամբ հետաքրքրվողները:

«Այնտեղ շատ համեղ խորոված են պատրաստում՝ մսի խոշոր կտորներից, իսկ տեղական կոնյակը հայտնի է հայկական ռադիոյից ոչ պակաս: Աղոթելու տեղ էլ շատ կա՝ այստեղ եկեղեցիներ ու վանքեր են կառուցվել 1 դարից սկսած, մինչ օրս պահվում են մեծագույն սրբություններ, օրինակ, գեղարդը, որը հավակնում է համարվել հենց այն նույն նիզակը, որով հռոմեացի զինվոր Լոնգինը խոցել է Քրիստոսին: Դե իսկ չսիրահարվել հյուրընկալ Հայաստանին ուղղակի անհնար է»,-ասվում է հոդվածում:

Հեղինակը խորհուրդ է տալիս ուղևորությունը սկսել մայրաքաղաք Երևանից, թեև, նշվում է, որ տնտեսելու համար կարելի է ինքնաթիռով հասնել Գյումրի, իսկ այնտեղից 2-3 ժամում՝ մեքենայով Երևան:

«Երևանին արագ, բայց համակողմանի ծանոթանալու համար, զբոսավարները խորհուրդ են տալիս զբոսնել Կասկադում: Դա 5 բաց հարթակներ են, որտեղ շատրվաններ են, թանգարաններ, ինչպես նաև քաղաքի լավ տեսարան է բացվում: Հաջորդ կետը կարող է դառնալ Ֆրանսիայի հրապարակը, որտեղ կանգնեցված է հայտնի Օգյուստ Ռոդենի քանդակը, որը Հայաստանին է նվիրել Ֆրանսիայի նախկին նախագահ Նիկոլյա Սարկոզին»,-ասվում է հոդվածում:

Նշվում է, որ պարտադիր է Սևան այցելել, ուր Երևանից կարելի է հասնել ընդամենը 50 րոպեում: Խորհուրդ է տրվում լինել նաև Դիլիջանում, որը Երևանից 100 կմ հեռավորության վրա է: Պարտադիր են այցելության համար նաև հայկական վանքերն ու եկեղեցիները:

«Աշունն իդեալական է Հայաստանին ծանոթանալու համար: Մինչև նոյեմբերի կեսը լավ տաք եղանակ է լինում, սակայն տարվա այդ եղանակին կարևորը հասունացած մրգերն են: Հայաստանում նաև համեղ է միսը, կաթնամթերքն ու գինին»,-ասվում է հոդվածում: