Սահմանադրական դատարանի նախագահ Հրայր Թովմասյանի փաստաբանական թիմն ապատեղեկատվություն է տարածում՝ ասելով, թե իրենց հնարավորություն չի տրվում ծանոթանալ նրա բնակարանում խուզարկություն իրականացնելու դատարանի որոշմանը: Այս մասին հայտնում են Հատուկ քննչական ծառայությունից:
Հունվարի 24-ի առավոտյան ՀՔԾ-ում հայտարարել են, որ ՍԴ նախագահի բնակարանում խուզարկություն է կատարվում: Ավելի ուշ Թովմասյանի պաշտպանական խմբից Ամրամ Մակինյանը հայտարարել էր, որ խուզարկությունը դեռ չի սկսվել, քանի որ քննչական խմբի ղեկավարը խոչընդոտում է Թովմասյանի իրավունքների իրացմանը, մասնավորապես՝ նրան և պաշտպան Միհրան Պողոսյանին հնարավորություն չի տրվում ծանոթանալ ամբողջ ծավալով դատարանի որոշմանը:
«Հարկ ենք համարում տեղեկացնել, որ քննիչի կողմից խուզարկությանը մասնակցող անձանց, այդ թվում` պաշտպանական թիմին հնարավորություն է տրվել քրեադատավարական օրենքով սահմանված կարգով ծանոթանալ որոշմանը: Մակինյանի վերը նշված հայտարարությունը նպատակ է հետապնդում ընդամենը խոչընդոտել քննչական գործողութան իրականացմանը»,- ասվում է ՀՔԾ հայտարարության մեջ:
Հատուկ քննչական ծառայությունից Հրայր Թովմասյանի պաշտպանական թիմին հորդորել են «գործել օրենքի սահմաններում և զերծ մնալ հանրությանն ապակողմնորոշող հայտարարություններ հնչեցնելուց»:
2019 դեկտեմբերին ՀՔԾ-ն Սահմանադրական դատարանի նախագահ Հրայր Թովմասյանին մեղադրանք էր առաջադրել ՔՕ-ի 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ): Թովմասյանի նկատմամաբ որպես խափանման միջոց էր ընտրվել ստորագրությունը չհեռանալու մասին:
