Քննիչները Սահմանադրական դատարանի նախագահ Հրայր Թովմասյանի բնակարանում աղաղակող ինչ-որ բան են փնտրում, որ կարողանան հանրությանը մատուցել պրոցեսի իրական լինելը: Նրա պաշտպանական թիմի անդամ Միհրան Պողոսյանի խոսքով՝ այս պահի դրությամբ առանձնահատուկ ոչինչ չի հայտնաբերվել, փոխանցում է Aysor.am-ը։

Հունվարի 24-ի առավոտյան ՀՔԾ-ում հայտարարել են, որ ՍԴ նախագահի բնակարանը խուզարկում են: Ավելի ուշ Թովմասյանի պաշտպան Ամրամ Մակինյանը հայտարարել էր, որ խուզարկությունը դեռ չի սկսվել, քանի որ քննչական խմբի ղեկավարը խոչընդոտում է Թովմասյանի իրավունքների իրացմանը, մասնավորապես՝ նրան և պաշտպան Միհրան Պողոսյանին հնարավորություն չի տրվում ծանոթանալ ամբողջ ծավալով դատարանի որոշմանը: ՀՔԾ-ից էլ Մակինյանին հորդորել էին ապատեղեկատվություն չտարածել:

«Քրեական դատավարության օրենսգիրքը պետք է բնակարանի խուզարկությունից առաջ ծանոթացնի որոշմանը։ Քննիչի նկատմամբ մենք որևէ վստահություն չունենք։ Որոշումն ամբողջությամբ չի ընթերցվել։ Քննիչն իր նախընտրած արտահայտություններն է արտաբերել», - ասել է Պողոսյանը։

Փաստաբանը նշել է, որ ինքը և Հրայր Թովմասյանն ամբողջությամբ չեն ծանոթացել որոշմանը։

«Ծանոթանալն անձի նախընտրելի եղանակով ծանոթացումն է։ Եթե սա արգելվում է, արդեն խտրական վերաբերմունքի մասին է խոսվում։ Մենք կբողոքարկենք որոշման պատճենն ունենալուց հետո։ Այսօրվա մեջ, կարծում եմ, կլինի այդ գործողությունը», - ասել է պաշտպանը։

ԱմրամՄակինյանը, իր հերթին, տեսանյութ էր հրապարակել, որտեղից պարզ է դառնում, որ պաշտպաններին թույլ չեն տալիս ծանոթանալ դատարանի որոշմանը, ըստ որի պետք է խուզարկություն իրականացվի:

2019 դեկտեմբերին ՀՔԾ-ն Սահմանադրական դատարանի նախագահ Հրայր Թովմասյանին մեղադրանք էր առաջադրել ՔՕ-ի 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ): Թովմասյանի նկատմամաբ որպես խափանման միջոց էր ընտրվել ստորագրությունը չհեռանալու մասին: