Նրանք, ովքեր հայտարարում են, թե ամեն ինչ գիտեն, նման են «Կարգին հաղորդման» սկետչերից մեկի հերոսին, ով վերջում հիմար իրավիճակում է հայտնվում, հայտարարել է վարչապետ Նիկոլ Փաշինյանը՝ արձագանքելով հարցին, թե արդոյք մտավախություն ունի՝ կապված ԱԱԾ նախկին ղեկավար Արթուր Վանեցյանի՝ մի օր խոսելու մասին հայտարարության հետ:
«Ես նմա՞ն եմ մի մարդու, որն ունի այդօրինակ մտավախություններ. ոմանք այնպիսի հայտարարություն են անում, որ... մի հայտնի «Կարգին հաղորդում» կա, երբ մեկը գալիս և ասում է, որ ամեն ինչ գիտի, հետո գալիս և ասում է, որ «ամեն, ամեն ինչ գիտի» և վերջում հայտնվում է հիմար վիճակում: Նրանք, ովքեր նման հայտարարություն են անում, հերթական այդօրինակ սկեչի հերոս են»,- ասել է վարչապետը:
Փաշինյանն առաջարկել է գտնել ու դիտել այդ մանրապատումը և ստանալ բոլոր հարցերի պատասխանները: Արձագանքելով ուժային կառույցների նախկին ղեկավարների և երկրում հեղաշրջման փորձի մասին դիտարկմանը՝ Կառավարության ղեկավարը նշել է, որ ՀՀ-ում եղել է հիբրիդային հեղաշրջման երազանք, նախապատրաստություն, երազախաբություն, բայց ոչ պետական հեղաշրջման փորձ:
Նոյեմբերին ԱԱԾ նախկին պետ Արթուր Վանեցյանը հայտարարել էր, որ ժամանակը կգա, և ինքն անպայման կխոսի և կներկայացնի իր տեսակետներն այն ամենի մասին, ինչը կատարվում է երկրում:
