21 փետրվարի 2020 - 12:01 AMT
Ջուլֆալակյանը դժգոհում է. Ուզում են Օլիմպիադայի ուղարկել ԱԱ-ում 5-րդ տեղը գրաված մարզիկի

ՀՀ հունահռոմեական ոճի ըմբշամարտի հավաքականի անդամ, աշխարհի և Եվրոպայի չեմպիոն, Օլիմպիական խաղերի արծաթե մեդալակիր Արսեն Ջուլֆալակյանը ֆեյսբուքյան իր էջում հայտարարել է, որ հունահռոմեական ըմբշամարտի հավաքականի մարզչական խորհուրդը ցանկանում է Օլիմպիադայի ուղարկել աշխարհի առաջնությունում 5-րդ տեղը գրաված մարզիկի:

Նա հավելել է, որ դրանով մարզչական խորհուրդն իր քաշային կարգում (77 կգ) կայացնում է ապօրինի, հակասպորտային, ոչ պրոֆեսիոնալ որոշում:

«Մարզչական կազմը ցանկանում է առանց պայքարի Օլիմպիական խաղեր ուղարկել մարզիկի, ով զուտ այդ մի մրցման ընթացքում անընդմեջ 2 գոտեմարտ է պարտվել (իսկ թե ում է հաղթել, մարզասերները գիտեն...)։ Ամբողջ աշխարհում չկա նման պրակտիկա, երբ մի քաշային կարգում մրցում են երկու ուժեղ մարզիկ և նրանցից մեկին ուղղակի չի տրվում խաղերի համար պայքարելու իրավունք։ Եվ տվյալ դեպքում զրկում են այդ իրավունքից մի մարզիկի, ով նորանկախ Հայաստանի մարզական պատմության մեջ 3-րդն է իր տիտղոսների քանակով:

…Խնդիրն այն է, որ Օլիմպիական խաղերին պետությունը պետք է ներկայացնի երկրի ուժեղագույն մարզիկը... Ում ասես պատրաստ են տանել Օլիմպիական խաղեր, միայն թե ես չլինեմ։ Ամոթ է։ Գոնե սպորտում ամեն ինչ հստակ է. ուժեղ է նա, ով հաղթում է։ Բայց հաղթելու համար պետք է մրցելու հնարավորություն տրվի»,- նշել է մարզիկը։

Ջուլֆալակյանը նաև հույս է հայտնել, որ մամուլը չի լռի, ինչպես նաև հանրությունը կպահանջի, որ կայանա նախապես պայմանավորված որոշիչ մրցաշար և ով կհաղթի, նա էլ իրավունք կստանա ներկայացնելու ՀՀ-ն Տոկիո 2020-ին։

Ջուլֆալակյանը ներկայացրել է նաև վերջին տարվա իր արդյունքները՝ նշելով, որ ունեցել է ընդամենը 22 գոտեմարտ, որոնցից 20-ը՝ հաղթական. (Նիսի մրցաշար` ոսկի (2019 հունվար), .Եվրոպայի առաջնություն` բրոնզ(2019 ապրիլ), Կրասնոդարի մրցաշար` ոսկի(2019 նոյեմբեր), Մոսկվայի մրցաշար` արծաթ (2019 նոյեմբեր), Դանիայի մրցաշար` ոսկի(2020 հունվար):