Ապրիլի 10-ից Սոցիալական ապահովության պետական ծառայության առցանց դիմումների կայքի միջոցով հնարավոր կլինի դիմել սոցաջակցություն ստանալու համար։ Այդ մասին ֆեյսբուքյան իր էջում տեղեկացրել է Ազգային ժողովի փոխխոսնակ Լենա Նազարյանը։
«Ապրիլի 10-ից այս կայքի միջոցով քաղաքացիները կարող են դիմել կորոնավիրուսի տնտեսական հետևանքների չեզոքացման միջոցառումներով նախատեսված սոցիալական աջակցությունները ստանալու համար»,- ասվում է գրառման մեջ։
Նազարյանը հավելել է նաև, որ մինչև այդ նույն կայքում կարելի է ծանոթանալ աջակցության տրամադրման կարգին և չափին:
Կառավարությունը, ընդհանուր առմամբ, կորոնավիրուսի համաճարակի հետևանքների մեղմման նպատակով տնտեսական աջակցության 8 միջոցառում է հաստատել, որոնցից 4-ն ունեն տնտեսական բնույթ, 4-ը՝ սոցիալական: