Արցախի նախագահ Արայիկ Հարությունյանը ֆեյսբուքյան եթերում դիմելով Ադրբեջանի նախագահ Իլհամ Ալիևին, ասել է․ «Մեզ հետ ուժի լեզվով երբևէ չփորձեք խոսել»։

Հարությունյանն արձագանքել է Ալիևի վերջին հայտարարություններին, թե «աշխարհում ուժի գործոնն է առաջնային պլան մղվում», իսկ բանակցությունների սեղանին ԼՂ հակամարտության կարգավորման փուլային տարբերակն է։

«Իլհամ Ալիևի հերթական հայտարարությունները քաղաքական գործչին վայել հայտարարություններ չէին․․․ Մանավանդ այս հայտարարությունը. «աշխարհում ուժի գործոնն առաջնային պլան է մղվում»: Այսինքն՝ ուժի միջոցով հարցի լուծման ճանապա՞րհն ես ընտրել: Պարո՛ն Ալիև, մենք պատրաստ ենք, ուզում եմ վստահեցնել, որ արդյունքները մեզ համար պարզ են: Այն, ինչ ունեցել եք 1994-ին, կունենաք նաև այսօր: Մեզ հետ ուժի լեզվով երբևէ չփորձե՛ք խոսել»,- ասել է Արցախի նախագահը:

Հարությունյանն անդրադարձել է նաև Ալիևի հայտարարությունը, թե ԼՂ հակամարտության լուծման միայն մեկ՝ փուլային տարբերակ կա, որը «ենթադրում է առաջին հերթին որոշ հողերի ազատում»։

«Փուլային լուծում կարող է լինել՝ այդ դեպքում առաջին հերթին ճանաչվում է Արցախի ինքնորոշման իրավունքը, անվտանգության երաշխքիներ են ընդունվում, որից հետո բանակցություններ են սկսվում։ Այլ տարբերակ չի լինելու»,- ասել է նա։

Իլհամ Ալիևը հայտարարել է նաև, որ Ադրբեջանի տարածքային ամբողջականությունը պետք է վերականգնվի։ «Եվ մենք դա կանենք։ Թող ոչ ոք չկասկածի։ Ուղղակի հարցը լուծելու համար մենք պետք է ավելի ուժեղ լինենք, ճիշտ գնահատենք ժամանակն ու աշխարհաքաղաքական իրավիճակը․․․Եվս մեկ անգամ հայտարարում եմ՝ Լեռնային Ղարաբաղը Ադրբեջան է և վերջ, և բացականչական նշան»,-ասել է Ալիևը։