Արցախի նախագահ Արայիկ Հարությունյանը հեռախոսազրույց է ունեցել Մեծի Տանն Կիլիկիո կաթողիկոս Արամ Առաջինի հետ՝ զորակցություն հայտնելով լիբանանահայերին։ Այդ մասին նա տեղեկացրել է ֆեյսբուքյան իր էջում։

«Զորակցելով լիբանանահայ մեր քույրերին և եղբայրներին՝ այս օրհասական պահին բոլոր հնարավոր միջոցներով աջակցելու պատրաստակամություն եմ հայտնել։ Արցախը Լիբանանի հետ է»,- ֆեյսբուքյան իր էջում գրել է Հարությունյանը։

Արցախի նախագահը հետաքրքրվել է ստեղծված իրավիճակով, տեղի հայկական համայնքի կորուստներով: Հարությունյանը Վեհափառին խնդրել է խորին ցավակցությունները փոխանցել զոհված հայրենակիցների հարազատներին, Լիբանանի բարեկամ ժողովրդին` բոլոր վիրավորներին շուտափույթ ապաքինում մաղթելով:

Օգոստոսի 4-ի երեկոյան Լիբանանի մայրաքաղաք Բեյրութի նավահանգստում ուժեղ պայթյուն է որոտացել։ Պայթյունն այնքան ուժգին է եղել, որ լսվել է քաղաքից 20 կմ հեռավորության վրա։ Քաղաքում մեծ ավերածություններ կան, տուժել է նաև հայկական թաղամասը, վնասվել է ՀՀ դեսպանության շենքը։ Հայ համայնքում կան զոհեր և վրավորներ։ Վնասներ է կրել նաև Մեծի Տանն Կիլիկիո կաթողիկոսությունը։