Մարզական 2012-ի ուրախ, սպասված և տխուր պահերն ըստ PanARMENIAN.Net-ի2012 թվականը հարուստ էր մարզական իրադարձություններով, ձեռքբերումներով ու հիասթափություններով: Այս տարի ևս PanARMENIAN.Net-ն անդրադարձավ հայ մարզիկների բոլոր ելույթներին, զրուցեց նրանցից շատերի հետ, ուրախացավ և տխրեց նրանց հետ միասին: Չնայած, որ միջոցառումներ շատ էին տեղի ունեցել, բայց մենք կազմել ենք կարևորությամբ աչքի ընկած իրադարձությունները և ներկայացնում ենք 2012-ի հայաստանյան ամփոփ մարզական տարին: 24 դեկտեմբերի 2012 PanARMENIAN.Net - Սպասված. Օլիմպիական խաղեր Ցանկացած մարզիկ իր կարիերայի առաջին օրվանից ձգտում է դեպի Օլիմպիական խաղեր: 2012 թվականին շատերն էին սպասում. Լոնդոնում պետք է մեկնարկեին 30-րդ ամառային Օլիմպիական խաղերը: 2008 թվականից հետո կայացած տարբեր վարկանշային մրցաշարերից հետո Հայաստանի Օլիմպիական հավաքականը մրցավայր մեկնեց 24 հոգով: Սպասումները մեծ էին, ողջ հայությունն էր սպասում մերոնց ելույթներին: Կարևոր են Օլիմպիական խաղերը, ու նաև պետք է աջակցել մեր մարզիկներին, քաջալերել ու ուրախանալ նրանց արձանագրած ցանկացած հաջողությունով: Իսկ առաջին մեդալը մեր թիմին ապահովեց ծանրորդ Հռիփսիմե Խուրշուդյանը` դառնալով անկախ Հայաստանի առաջին մարզուհին, ում հաջողվեց Օլիմպիական խաղերում մեդալակիր դառնալ: Նույն օրը, ընդամենը մի քանի րոպե անց մենք բոլորս կրկին ցնծում էինք. մեդալն ավելի ազնիվ մետաղից էր: Օլիմպիական արծաթե մեդալ նվաճեց հունահռոմեական ոճի ըմբիշ Արսեն Ջուլֆալակյանը: Արծաթե մեդալ Հայաստանին չէր հաջողվել նվաճել երեք Օլիմպիադաներ շարունակ: Հաջորդ բրոնզե մեդալը կրկին ապահովեցին ըմբիշները: Այս անգամ հաջողության հասավ հունահռոմեական ըմբիշ Արթուր Ալեքսանյանը: Այս երիտասարդ մարզիկը տարեսկզբին դարձել էր նաև Եվրոպայի չեմպիոն, ու մասնագետները նրանից սպասում էին ոսկե մեդալ: Սակայն Ալեքսանյանը կանգնեց պատվոհարթակի երրորդ աստիճանին` Հայաստանի համար նվաճելով երրորդ` վերջին, մեդալը: Համոզված ենք, որ բոլորն էլ ավելի լավ արդյունք էին անկնկալում, սակայն սրանք Օլիմպիական խաղեր են, որտեղ ոչինչ հնարավոր չէ կանխատեսել: Իսկ Լոնդոնում թիմային հաշվարկով Հայաստանը 205 երկրների մեջ զբաղեցրեց ոչ այդքան վատ 60-րդ հորիզոնականը:
Ուրախ. Շախմատի Համաշխարհային Օլիմպիադա Հայաստանի շախմատի տղամարդկանց հավաքականը 3-րդ անգամ Համաշխարհային Օլիմպիադայից վերադարձավ ոսկե մեդալներով: Այս անգամ աշխարհի ուժեղագույն շախմատիստների կոչումը նվաճվեց թուրքական Ստամբուլ քաղաքում: Իհարկե, մեր հավաքականը վաղուց է մեզ «երես տվել» իր հաղթանակներով, բայց միայն այն միտքը, որ 155 թիմերի պայքարում հենց մեր շախմատիստներն են չեմպիոնի կոչումը նվաճել, իրար էին խառնվում անսահման հպարտությունն ու ուրախությունը, և մարդիկ իրար բարևելու փոխարեն պարզապես «շնորհավոոոոոոոոր» էին ասում: Մեր շախմատային հաջողությունը կարելի է թերևս համեմատել Իսպանիայի ֆուտբոլի հավաքականի ձեռքբերման հետ. 6 տարում Համաշխարհային Օլիմպիադայի 3 ոսկե և աշխարհի թիմային առաջնության չեմպիոնական մեդալներ… Օլիմպիադայի 11 տուրերի ընթացքում մերոնք հաղթել են Բոլիվիայի, Բանգլադեշի, Իսպանիայի, Ֆիլիպինների, Ուկրաինայի, Ուզբեկստանի, Գերմանիայի, Հոլանդիայի և Հունգարիայի հավաքականներին: Մեկ անգամ ոչ ոքի խաղացել ռուսների հետ, և կրել միայն մեկ պարտություն` Չինաստանից: «Ոսկե հավաքականի» անկրկնելի շախմատիստներ Լևոն Արոնյանը, Սերգեյ Մովսիսյանը, Վլադիմիր Հակոբյանը, Գաբրիել Սարգսյանը և Տիգրան Պետրոսյանը աշխարհի լավագույն մարզիչ Արշակ Պետրոսյանի գլխավորությամբ հերթական անգամ արեցին անհնարինը: Օլիմպիադայում երրորդ հաղթանակը հայ ժողովուրդն ընդունեց ոչ պակաս ոգևորված ու խանդավառ, քան 2006 թվականի թուրինյան ոսկին, քանի որ նրանք արդեն գիտեին հաղթանակի համն ու դրան հասնելու դժվարին ուղին: Ոչ այդքան շատ ոլորտներ կան, որտեղ Հայաստանը հպարտությամբ կարող է ԱՌԱՋԻՆԸ լինել, բայց հայ շախմատիստները մեզ շարունակում են ապացուցել, որ նվիրված աշխատանքի, թիմային խաղի և անմնացորդ նվիրվածության շնորհիվ անհնար է աշխարհում առաջատար չլինել:
Լավ աշխատանք. Երևանյան բռնցքամարտի աշխարհի երիտասարդական առաջնություն Նոյեմբերի 25-ից դեկտեմբերի 8-ը Երևանում իսկական բռնցքամարտի տոն էր. Հայաստանն ընդունել էր բռնցքամարտի աշխարհի երիտասարդական առաջնությունը: Մեր երկրի մայրաքաղաքը հյուրընկալել էր 68 երկրի ավելի քան 700 բռնցքամարտիկների: Ի դեպ, Հայաստանի բռնցքամարտի ֆեդերացիան կազմակերպել էր նաև 2009 թվականի աշխարհի պատանիների առաջնությունը: Իսկապես, մեծ պատիվ է ընդունել նման մեծ մասշտաբի միջոցառում ու կազմակերպել բարձր մակարդակով: Իսկ լավ կազմակերպելու փաստը նշեց նաև ԱԻԲԱ-ի նախագահ Չինգ Կու Վուն: Ըստ Վուի, կարճ ժամանակահատվածում Հայաստանը կարողացել է շատ լավ կազմակերպել այդ միջոցառումը, ինչը հնարավորություն է տալիս Հայաստանին ընդունել նաև այլ առաջնություններ: Այնպես որ, չի բացառվում, որ առաջիկայում մեր երկիրը կրկին ականատես կլինի բռնցքամարտի գեղեցիկ ու դինամիկ մենամարտերի: Իսկ երևանյան առաջնությունում, հայ բռնցքամարտիկներից երկուսին հաջողվեց մեդալ նվաճել: Աշխարհի առաջնության ոսկե մեդալակիր դարձավ Նիկոլայ Հարությունովը, իսկ բրոնզե մեդալի տիրացավ Նարեկ Մելքոնյանը:
Հիասթափություն. Ֆուտբոլի ազգային հավաքական Եվրոպայի առաջնության ընտրական մրցաշարում հաջող ելույթից և ՖԻՖԱ-ի դասակարգման աղյուսակում իր համար ամենաբարձր`41-րդ, տեղում հայտնվելուց հետո երկրպագուները սկսեցին հավատալ հայկական ֆուտբոլի վերելքին: Բայց 2012-ը ստացվեց սպասվածից ավելի վատ: Շատերը, այդ թվում նաև ՀՖՖ նախագահ Ռուբեն Հայրապետյանը, հավատում էին , որ 2014 թվականի աշխարհի առաջնության ընտրական մրցաշարի երկու արտագնա խաղերում Բուլղարիայի և Մալթայի դեմ մեր ընտրանին վաստակելու է 6 միավոր: Իրականում, Վարդան Մինասյանի սաները կարող էին նման արդյունք գրանցել, սակայն միշտ չէ, որ հաջողվում է պլանավորածն իրականացնել: Իտալիայի հետ խաղում էլ հաղթելու ցանկությունը չափազանց մեծ էր, բայց Եվրոպայի փոխչեմպիոններին մարտահրավեր նետելն այդքան էլ հեշտ չէր: Հայաստանի հավաքականը տարին եզրափակելու է իր խմբում զբաղեցնելով 4-րդ տեղը` վաստակած ընդամենը 3 միավորով և ՖԻՖԱ-ի դասակարգման աղյուսակի 75-րդ հորիզոնականում: Հուսանք, որ 2013-ին ֆուտբոլիստները կկարողանան կրկին վերգտնել իրենց խաղն ու ընտրական մրցաշարն ավարտել հնարավորինս հաջող:
Նոր սպասումներով Ավարտվում է նաև 2012 թվականը, որը որոշ մարզիկների համար լավ դասավորվեց, որոշների մոտ էլ` ոչ այդքան: Այս ողջ տարվա ընթացքում (և ոչ միայն այս տարվա) PanARMENIAN.Net ը միշտ եղել է մեր մարզիկների կողքին, իր նյութերի միջոցով փորձել է սատարել ու քաջալերել նրանց: 2013 թվականին մեկնարկում է Օլիմպիական նոր ցիկլը, ու այս տարվանից սկսած, բոլոր մարզիկները նախապատրաստվելու են արդեն հաջորդ Օլիմիադային: Իսկ մինչ այդ, կկայանան Եվրոպայի ու աշխարհի առաջնություններ, միջազգային մրցաշարեր: Այս ամենին մասնակցելու են նաև հայ մարզիկները, ու PanARMENIAN.Net ը նրանց ի սրտե մաղթում է շատ հաղթանակներ, վնասվածքներից հեռու տարի ու անսահման մեծ երջանկություն: Հասմիկ Բաբայան, Գոհար Նալբանդյան / PanARMENIAN News Ամենաընթերցվողը բաժնում Մասնագետը՝ առողջ ապրելակերպի մասին Ինչու են կանայք ընտրում ֆիթնես և բոդիբիլդինգ Լավագույն app-երը՝ առավել զգուշավորների այլընտրանք Ինչպես են մարզասրահները և մարզվողները «ֆորմի մեջ» մնում Բաժնի այլ նյութերը Easy ֆուտբոլ՝ մեծ էկրանին Դարձիր «12-րդ խաղացող» Անգլիական այգում, երկրպագիր մերոնց մաքուր օդին Ուղին անվանում է առաջնամագլցողը Հարմարավետության գոտուց դուրս, քաղաքային աղմուկից հեռու Բրազիլական ջիու-ջիցուն Հայաստանում Գետնի վրա մենամարտել իմացողն առավելություն ունի | Մինչև 10% քեշբեք GetTransfer-ից՝ IDBank-ի քարտերով Քեշբեքի չափը կախված է IDBank-ի քարտից G7-ի երկրները կոչ են արել Բաքվին կատարել հումանիտար իրավունքի իր պարտավորությունները Նրանք նաև կոչ են արել Երևանին և Բաքվին հավատարիմ մնալ խաղաղ գործընթացին ftNFT ֆիջիթալ սփեյսում քննարկվել է AKNEYE-ի հետ գործակցությունը և մտավոր սեփականության իրավունքը Ետալեանը ներկաներին պատմել է AKNEYE-ի հետ գործակցության սեփական փորձի մասին Լավրով․ ՀՀ-ն դեռ ինքը չի կարող որոշել ՀԱՊԿ պատասխանատվության գոտին իր տարածքում Նա ասել է, որ պետք է «նշել Հայաստանի սահմանները, ավարտել սահմանազատումը» |