«Քաղցած խաղեր». Սիրային եռանկյունու ստանդարտ ֆինալը

«Քաղցած խաղեր». Սիրային եռանկյունու ստանդարտ ֆինալը

Լոուրենսի ֆիլմերի հիմնական թերությունը` «անհամաչափությունը», այստեղ հասցվել է գագաթնակետին

Երևանի կինոթատրոններում նոյեմբերի 19-ին մեկնարկում է ամերիկուհի գրող Սյուզեն Քոլինզի պատումի էկրանավորման եզրափակիչ մասը: «Ճայ-Ծաղրասարյակը», ամենևին ոչ հանուն հանդիսատեսի, այլ մեծ շահույթ ստանալու ակնկալիքով, որոշվեց կիսել 2 մասի: Հաշվի առնելով վեպի առանձնահատկությունը, անցյալ տարի էկրաններ բարձրացած ` «Քաղցած խաղեր. Ճայ-Ծաղրասարյակը. Մաս 1» երկար վերնագրով առաջին մասը, անհամ էր ու ձանձրալի: Գրքի «ամենայուղալի» մասը պրոդյուսերները պահել էին եզրափակիչ մասի համար` սակայն Քիթնիս Էվերդինի ղեկավարությամբ ազատ մարդկանց և աշխարհի հզորների ճակատամարտն ավելի շուտ գործողության ու դրամայի անկապ հավաքածու է հիշեցնում, քան ամբողջական ֆիլմ:

PanARMENIAN.Net - PanARMENIAN.Net ը տպավորություններն է ներկայացնում «Քաղցած խաղեր. Ճայ-Ծաղրասարյակը. Մաս 2» ֆիլմից:

Քիթնիս Էվերդինն ու Փիթ Մելլարքը փորձում են հաղթել բռնատիրական Կապիտոլիումի և պատերազմից բզկտված Պանեմի շրջանների միջև քաղաքացիական պատերազմում: Թե ովքեր են Քիթնիսն ու Մելլարքը և ինչ է Կապիտոլիումն ու Պանեմը, հիանալի հայտնի է վիպաշարի և ֆիլմաշարի երկրպագուներին: Ամբողջ ֆիլմի սինոփսիսը կարելի է այսպես նկարագրել. Հետապոկալիպտիկ Հյուսիսային Ամերիկայում (Պանեմ) իշխանավորները (Կապիտոլիում) պարբերաբար մահացու մրցաշարեր են կազմակերպում հալածված և աղքատ շրջանների երիտասարդների խմբերի միջև, որոնք կոչվում են «Քաղցած խաղեր»: Խաղերի ամենահաջողակ մասնակիցներից Քիթնիս Էվերդինը (Ջենիֆեր Լոուրենս) և նրա համախոհները 3 սերիա շարունակ ոչ միայն սպանում են և մեռնում հանդիսատեսի աչքի առաջ, այլ նաև աստիճանաբար մոտեցնում են Կապիտոլիումի ազատագրումն ու երկրի հալածված և քաղցած բնակիչների ազատագրումը բռնատիրությունից և դաժանություններից:

Ֆիլմաշարի վերջին 3 մասերի ռեժիսոր Ֆրենսիս Լոուրենսը նույնիսկ չի փորձում ինչ-որ թարմություն հաղորդել պատմության եզրափակիչ մասի ուռճացված տևողությանը: Ինչպես լավ արհեստավոր և միջակ վիզիոներ, Լոուրենսը ուշադրությունը սևեռում է մի քանի գեղեցիկ էքշն տեսարանների վրա` մնացածը վստահելով օգնականներին: Անզեն աչքով երևում է, որ նա չի ցանկացել վիզուալիզացիայի ենթարկել Սյուզեն Քոլինզի «հանճարեղ» դրամատուրգիական լուծումները` հերոսների անվերջանալի երկխոսությունները, տառապանքները նրան չեն հետաքրքրում, իսկ ռեժիսորի ոգին ու հեղինակային հայացքը հանկարծ արթնանում են միայն Կապիտոլիումի զորքերի հերթական գրոհի կամ ստորգետնյա մուտանտների հարձակման ժամանակ:

Ջանալով արդարացնել հոնորարը` հեղինակը չգիտի, թե երբ է պետք վերջակետ դնել այս երկար պատմության մեջ: Ինչպես «Մատանիների տիրակալի» վերջին մասի դեպքում էր, կինոնկարն անընդհատ մոտենում է ավարտին, բայց ոչ մի կերպ չի կարողանում վերջանալ` ֆինալը հաջորդում է ֆինալին, և հերթական տեսարանից հետո, երբ արդեն թվում է, թե ժամանակն է, որ արդեն տիտրերը գրվեն, ռեժիսորը մի նոր, անիմաստ տեսարան է պատկերում: Շարադրանքի պատառոտվածությունը, զրկված մասերի օրգանական կապից, արդեն դարձել է Լոուրենսի ստեղծագործական այցեքարտը: Վերջին «Քաղցած խաղերում» Լոուրենսի ֆիլմերի հիմնական թերությունը` «անհամաչափությունը», հասնում է գագաթնակետին` երբեմն բարդ է հիշել, թե ինչ իրադարձություն էր նախորդում այս կամ այն տեսարանին:

Լավ դերասանուհի Ջենիֆեր Լոուրենսը նյութ չունի խաղալու, ինչպես նաև մյուս, ոչ պակաս հայտնի հոլիվուդյան դերասանները, որ մասնակցում են ֆիլմին: Միայն ավարտին մոտ Ջենիֆերը մի անհավանական խաղ է ցուցադրում միայն հայացքի միջոցով, կարծես հիշեցնելով, որ ինքն ավելիին է արժանի, քան մասնակցությունը հերթական «փոփքորնային» ֆիլմին: «Մթնշաղանման» երիտասարդական ֆիլմը լարված քաղաքական թրիլերի վերածելու հեղինակների փորձերը վերջում ավելի են աղճատում ներքին տրամաբանությունը, որտեղ նույնիսկ լավագույն դերասանները չեն կարող առանցք հանդիսանալ, որը թույլ կտար խուսափել ամբողջ կառույցի փլուզումից:

Ընդհանուր առմամբ ֆիլմաշարի մոլեռանդ երկրպագուները գոհ կմնան: «Երիտասարդական լսարանին» ուղղված պահանջարկը կարծես մարում է, ինչպես ժամանակին Հոլիվուդը հրաժարվեց «երիտասարդական վամպիրական սագաներ» «թխելուց»: «Քաղցած խաղերի» ավարտն առաջին ազդանշանն է «Դիվերգենտների» և «Լաբիրինթոսում վազողների համար», որ եզրափակվելու ժամանակն է:

Արման Գասպարյան/ PanARMENIAN.Net
 Ամենաընթերցվողը բաժնում
«ԿինոՊարկը» վերաբացվել է
Մաքուր արվեստի ու դրա շուրջ ուրիշ հարցերի մասին
Ինչ խնդիրներ ունեն հայկական հուշարձանները հետազոտողները
Աստվածային թեմաներից մինչև կենցաղային հարցեր
 Ուշադրության կենտրոնում
ԱԳՆ․ Արցախում վտանգված է մոտ 1500 մշակութային օբյեկտ, այդ թվում՝ 161 եկեղեցի, մոտ 600 խաչքար

ԱԳՆ․ Արցախում վտանգված է մոտ 1500 մշակութային օբյեկտ, այդ թվում՝ 161 եկեղեցի, մոտ 600 խաչքար Նա նշել է, որ Ցեղասպանության զոհ գնաց նաև հայկական մշակութային ժառանգության հսկայական մասը

 Բաժնի այլ նյութերը
«Եթե այս սերնդի գործերը մնան անավարտ՝ որպես ազգ ու պետություն չենք հաջողելու» Զոհված բժշկի հարազատները շարունակում են իրագործել նրա երազանքը
Հարրի Փոթերը 40 տարեկան է Տղա մոխրոտի պատմությունը
«Վանքերից բացի նաև բերդեր ենք կառուցել» Հայաստանը՝ 150-ից ավելի ամրոցի երկիր