Քաչալ գլուխ, ճխլած խաղող ու սատանիզմ

Քաչալ գլուխ, ճխլած խաղող ու սատանիզմ

Ինչ նոտայի վրա սկսվեց ու ավարտվեց Կոնսերվատորիայի աղմկոտ միջոցառումը

Երևանի Կոմիտասի անվան պետական կոնսերվատորիայի նկուղում անցկացված միջոցառումն արդեն մի քանի օր է՝ լայն քննարկման առարկա է դարձել:

PanARMENIAN.Net - 2 ժամ տևած միջոցառումը դադարեցվել էր դասախոսներից մեկի և ուսանողների բարձրացրած աղմուկից հետո: Ներկաների արտաքին տեսքը, միջոցառման բնույթը և հնչած երաժշտությունը նրանց կասկածելի և անընդունելի էր թվացել:

Միջոցառումից տեսագրություններ տարածվելուց հետո մամուլում այն որակվել էր «սատանիստական և ԼԳԲՏ համայնքի քարոզ անող»։ Կոնսերվատորիայի փողային և հարվածային գործիքների ամբիոնի դասախոսներից մեկը՝ Վյաչեսլավ Մանուչարյանը, միջոցառման պահին անցնելիս է եղել բուհի կողքով: Նա առաջիններից է եղել, ով մտահոգություն է հայտնել միջոցառման մասին:

«Անցնում էի կողքով, տեսա: Երաժշտությունը, մարդկանց հագուստը, քաչալ աղջիկը, վզին «շան ցեփ» էր գցած և այլն. դա դուրս չեկավ: Դա տարօրինակ չէ, աննորմալ բան է, Կոնսերվատորիայում, որտեղ ուսանողներն են սովորում, տենց բան չեն անում»,- պատմեց Մանուչարյանը PanARMENIAN.Net -ին։

Դասախոսի խոսքով՝ ուսանողներից մեկը դուրս է եկել, ասել է, որ հնչում է Կոմիտաս, ինքն էլ հակադարձել է, թե գիտի՝ որն է Կոմիտասի երաժշտությունը: Մանուչարյանի հետ ուսանողների խոսակցությունն այսքանով ավարտվել է, դասախոսը զանգահարել է ռեկտորին, ասել միջոցառման մասին, վերջինս էլ նշել է, որ դրանից տեղյակ չէ, բայց գիտի, որ ուսանողները թեյախմություն են կազմակերպել:

«Ես չեմ պնդում, որ միջոցառումը սատանիստական է, ես տենց բաների հետ ոչ մի կապ չունեմ, բարեբախտաբար: Չգիտեմ, բայց ինձ դուր չեկավ ճաղատ գլխով աղջիկը: Հարիր չէ մեր Կոնսերվատորիային, ինչի հետ համամիտ է նաև ռեկտորը: Ես սատանիզմի անուն չեմ տվել, ես ասում եմ՝ աննորմալ երևույթ է, իսկ տենց բաներ չգիտեմ էլ՝ սատանիզմ, եհովաական»,- ասաց Մանուչարյանը:

Բուհի ռեկտոր Սոնա Հովհաննիսյանը թեմայով ասուլիսի ժամանակ աղմուկը որակել էր «փաստերի խեղաթյուրում և բուհի ղեկավարությանը զրպարտելու փորձ»: Ռեկտորն ասել էր, որ իրեն անպատշաճ վարքի առիթով ահազանգել են ուսանողներն և դասախոսներից մեկը: Չնայած՝ միջոցառումը կրոնական ու սեռական ուղղվածություն չի ունեցել, այնուամենայնիվ Հովհաննիսյանը նաև հայտնել էր, որ նմանատիպ էլեկտրոնային երաժշտության միջոցառում գուցե և պետք չէր կազմակերպել:

Միջոցառման կազմակերպիչ, Ad libitum նախաձեռնության հիմնադիր Հայկ Մակիյանը կարծիք է հայտնել, որ ժամանակակից արվեստը, լինելով ոչ մասայական, ոչ հանրային, կարող է առաջացնել նաև վախ, սակայն բուհը ստեղծագործական, ստեղծարար-նորարարական տարածք է:

«Միջոցառման ֆորմատը պատրաստի ինչ-որ արդյունք չէ՝ ո՛չ ցուցահանդես է, ո՛չ ներկայացում, ո՛չ համերգ, այն կոնցեպտուալ, գաղափարական մի բան է, որ ենթադրում է մասնակցի գործոնը, արտիստը կատարողն է ու հենց այդ տեղն ու ժամանակն էլ արվեստի կոնցեպտն են կազմում: Իսկ արվեստի կոնցեպտը հետևյալն էր՝ խաղող են տրորում, ավանդական երաժշտություն է, գորգեր, հետո շարունակվում է էլեկտրոնային երաժշտություն»,- պատմեց Մակիյանը:

Նա նշեց, որ հասկանում է նաև ռեկտորի դիրքորոշումը. բուհի բարի համբավի վրա են անդրադառնում «ճոխացված փաստերով» տեղեկությունները: Հայկ Մակիյանն ասաց, որ հակված է մտածել՝ ստեղծագործական բուհում այլասերվածության հետ ոչ մի կապ չունեցող նորարարությունը և փորձարարությունը նույնիսկ պետք են:

«Կարող են ընդունել կամ չընդունել, բայց պետք է ճանաչեն դա, որ ուրիշ ոչ մի բանի հետ չխառնեն: Պատկերացնո՞ւմ եք՝ մարդիկ էդ նույն կարծրատիպերով վաղը մեր հասարակության մշակութային ոլորտներում լինեն, ու էդ ամբողջ վախը տատարծվի: Պետք է բաց լինել, գիտակից, ամեն ինչ իմանալ, նոր դրանից հետո սիրել կամ չսիրել»,- ասաց Մակիյանը:

ՀՀ ԱԺ ԲՀԿ խմբակցության պատգամավոր Արման Աբովյանը հարցում էր ուղղել ՀՀ ԿԳՄՍ նախարարին՝ պարզաբանելու, արդյոք միջոցառմանն իրո՞ք մասնակցել են «ԼԳԲՏ ներկայացուցիչներ, սատանիստական աղանդի անդամներ», թե ոչ: Մեզ հետ զրուցում Աբովյանը նշեց, որ առայժմ ոչ մի պատասխան չի ստացել, իսկ հարցումը գրել է քաղաքացիներից ստացած 20-ից ավել բողոքների հիման վրա:

Հարցին՝ ինչն է, իր կարծիքով, սատանիզմը, ու սատանիզմի կոնկրետ ո՞ր ճյուղն է նրան հիշեցրել համերգում տեղի ունեցածը, պատգամավորին այդպես էլ հստակ չպատասխանեց։ Խնդրանքին՝ նշել, թե ինչ կոնկրետ սատանիստական երևույթներ կան տեսանյութում, Աբովյանն ասաց, որ հարցումն ուղարկել է քաղաքացիների խնդրանքով և լրատվամիջոցների հրապարակումների վրա հենվելով:

«Սատանիզմը քրիստոնեության հակառակ կողմն է: Կոպիտ ասած, կարելի է մտնել Վիքիպեդիա կարդալ, ևս երկար է… Սատանիզմն այն է, որ մարդիկ դավանում են սատանային և դավանում են բոլոր բացասականը՝ դաժանություն և այլն, և այլն: Թե սատանիզմի որ ճյուղի մասին է խոսքը՝ կխուսափեմ խոսել, որովհետև տեղեկությունը շատ քիչ է, սակայն պետք է հասկանալ, որ՝ կրթական օջախում և առհասարակ, այդպիսի գաղափարներ տարածելը վտանգ է ներկայացնում»,- ասաց նա:

Ճշտող հարցին, թե, այնուամենայնիվ, ինքն ինչն է համարում սատանիստական քարոզ, Աբովյանը նշեց, որ երկար կստացվի, եթե լեկցիա կարդա, բայց կան դավանանքներ, որոնք ներկայացնելն ուղղակի հասարակական և բարոյական վտանգ է պարունակում:

«Այստեղ խնդիրն առաջին հերթին սատանիստների մասին է և տարատեսակ, այսպես կոչված միջոցառումների, որոնք կարող են հանրային վտանգ ներկայացնել»,- ասաց պատգամավորը: Աբովյանը նաև նշեց, որ բնավ չի պնդում, թե միջոցառումն իրոք տարածել է նման գաղափարներ, իսկ հարցումն ուղղվել է՝ հաշվի առնելով այս թեմայով տեղեկատվական հոսքը:

Սատանիստական միջոցառման կազմակերպչի համբավ ստացած Մակիյանն իրականում Հայ Առաքելական եկեղեցու հետևորդ է․ սատանիզմ քարոզելու մեջ մեղադրելուց կամ կասկածելուց առաջ ոչ մի լրատվամիջոց կամ գործիչ չի ճշտել դա:

Անահիտ Հակոբյան / PanARMENIAN.Net
 Ամենաընթերցվողը բաժնում
Ինչպես միանալ ոլորտի առաջատար միջազգային ընկերությանը
Ինչպես է աշխարհը լուծում օրգանների փոխպատվաստման խնդիրը
Արևմուտքի սանկցիաները խփում են նաև ռուսական դեղարտադրությանը
Մարտի 8-ին՝ սթափության լրացուցիչ չափաբաժին
 Ուշադրության կենտրոնում
Բեգլարյան․ Ազատության հրապարակում Արցախի ժողովրդի կարիքների ապահովման համար հանրահավաք կանցկացվի

Բեգլարյան․ Ազատության հրապարակում Արցախի ժողովրդի կարիքների ապահովման համար հանրահավաք կանցկացվի Հավաքի նպատակն է քննարկել ու բարձրաձայնել Արցախի ժողովրդի առաջարկներն ու պահանջները

 Բաժնի այլ նյութերը
Հեպատիտի նոր ենթատեսակը տարածվում է երեխաների շրջանում Ինչ է այն ու ինչպես պայքարել` հայտնի չէ
Հայրենիքը՝ հեծանիվի դիմաց Ինչ արժե պետությանը դավաճանելը
Յոթ որդու Բավական քույրը Տարեկան քանի՞ աղջիկ չի ծնվում Հայաստանում
---