Ով չի ուզում դառնալ միլիոնատեր

Ով չի ուզում դառնալ միլիոնատեր

Պատժամիջոցների թիրախում ռուս միլիարդատերերն են

Երբ Ուկրաինայում պատերազմի սկզբում պատժամիջոցների հետևանքով ռուս խոշոր գործարարները մեկ օրում 38 միլիարդ դոլար կորցրին, շատերը պնդում էին, թե դա միայն սկիզբն է, բայց քչերն էին պատկերացնում, որ որոշ միլիարդատերեր կմնան առանց գրպանի փողի:

PanARMENIAN.Net - Արևմուտքը ռուս գործարարներին և նախագահ Վլադիմիր Պուտինի մերձակա շրջապատի միլիարդատերերին սեղմում է ամեն օր ավելացող պատժամիջոցներով, սառեցված հաշիվներով և զբոսանավեր առգրավելով:

Ուկրաինայում ծնված, Մեծ Բրիտանիայում ապրող հրեական արմատներով ռուս միլիարդատեր Միխայիլ Ֆրիդմանն արևմտյան պատժամիջոցներից ամենաշատը տուժած գործարարներից է: Ալֆա Գրուպի հիմնադրի կարողությունը մինչև պատերազմը 14 միլիարդ դոլար էր: Հիմա Մեծ Բրիտանիայի կառավարությունը նրա ամբողջ կարողությունը սառեցրել է: Շաբաթներ առաջ Ֆրիդմանը հարցազրույցներից հրաժարվում էր, լրագրողների զանգերին էլ չէր պատասխանում: Այսօր գործարարն այնքան ճարահատյալ վիճակում է, որ ինքն է զանգել լրագրողին և նեղսրտել ստեղծված պայմաններից:

Ֆինանսական որևէ գործողություն անելուց առաջ Ֆրիդմանը ստիպված է ձևաթուղթ լրացնել և դիմել Մեծ Բրիտանիայի կառավարությանը: Եթե բախտը բերի, կառավարությունն ամսական 3000 դոլար գումար կտրամադրի: Ֆրիդմանն այքան բարդ վիճակում է, որ նույնիսկ չի կարողանում վճարել տան հավաքարարին: Նույնիսկ մտածում է տան մաքրությունն իր վրա վերցնել, ինչպես հին և բարի ժամանակներում, երբ ուսանողական տարիներին ապրում էր հանրակացարանում: Ֆրիդմանը նաև իսրայելական անձնագիր ունի, բայց Լոնդոնից չի հեռանում, որովհետև Իսրայելում տուն չունի և գումար էլ չունի՝ նորը գնելու համար: Նա կարծում է, որ արևմտյան երկրները չգիտեն, թե ում հետ գործ ունեն: Վստահեցնում է՝ գործարարները Պուտինի վրա այնքան ազդեցություն չունեն, ինչքան արևմուտքն է կարծում: Հետևաբար չեն կարող ստիպել կամ խնդրել Պուտինին՝ վերջ դնել պատերազմին: Այս կերպ ռուս գործարարն ուղիղ տեքստով ասում է, որ իր դեմ կիրառվող պատժամիջոցներից տուժում է միայն ինքը և Պուտինի որոշումների վրա ազդելու որևէ լծակ չունի:

Ընդհանուր առմամբ Եվրամիության, Մեծ Բրիտանիայի, Միացյալ Նահանգների թիրախում են հայտնվել տասնյակ ռուս գործարարներ: Նրանցից շատերին մեղադրում են «կրեմլամետ» դիրքորոշման մեջ: Ամերիկյան մամուլը գրում է՝ նախկին փոխվարչապետ, ադամանդի հանքի գործադիր տնօրեն, ՊԱԿ նախկին ղեկավար… ռուս որոշ օլիգարխնեը զբաղեցրել կամ զբաղեցնում են թոփ պաշտոններ: Պատժամիջոցները չեն նշանակում, որ պետությունը կարող է առգրավել գործարարների ամբողջ ունեցվածքը: Նրանք իրավասու են սառեցնել ակտիվները, արգելել վաճառքը կամ փակել եկամուտ ստանալու լծակները: Սառեցված ակտիվները տեխնիկապես շարունակում են պատկանել գործարարներին, բայց պատկերավոր ասած՝ նրանց ձեռքերն ու ոտքերը կապված են: Իրականում այս պատժամիջոցները կարող են տասնյակ դատական գործերի հանգեցնել: Իրավական հարցերն էլ կարող են տարիներ տևել:

Պատերազմի առաջին օրերին ԱՄՆ նախագահ Ջո Բայդենը ռուս օլիգարխներին դիմելով հայտարարեց՝ «մենք գալիս ենք ձեր հետևից, ձեր շքեղ առանձնատների, զբոսանավերի և օդանավերի հետևից»: Սա ոչ թե սպառնալիք էր, այլ զգուշացում, որովհետև հաջորդող օրերը ցույց տվեցին, որ ռուս միլիարդատերերի ունեցվածքն իսկապես վտանգված է: Միացյալ Նահանգներում նույնիսկ հատուկ քննչական խումբ է ստեղծվել, որի նպատակն է հետախուզել ռուս օլիգարխներին և առգրավել նրանց ունեցվածքը: Այս խմբում ընդգրկված են երկրի ֆինանսների, ներքին գործերի և արդարադատության նախարարությունները:

Եվրոպայում ևս մեկը մյուսի հետևից անակնկալ են մատուցում միլիարդատերերին և առգրավում զբոսանավերն ու առանձնատները: Իտալիայում, օրինակ, առգրավեցին գործարար Անդրեյ Մելնիչենկոյի՝ 530 միլիոն եվրո արժողությամբ աշխարհի ամենամեծ մասնավոր զբոսանավը: Նրա ունեցվածքը գերազանցում է 11 միլիարդ դոլարը: Իտալացիներն առգրավեցին նաև Ալիշեր Ուսմանովին պատկանող շքեղ ու թանկարժեք առանձնատունը, հեռուստալրագրող Վլադիմիր Սոլովյովի երկու վիլլաները: Լոնդոնում ավելի դաժան գտնվեցին: Ցուցարարները ներխուժեցին և գրավեցին միլիարդատեր Օլեգ Դերիպասկայի առանձնատունը: Մեծ Բրիտանիայի փոխվարչապետն էլ հայտարարեց, թե կառավարությունը գուցե օգտագործի ռուս օլիգարխների առանձնատները՝ ուկրաինացի փախստականներին տեղավորելու համար:

Պատժամիջոցների տակ է նաև Ռոման Աբրամովիչը, կասկածի տակ են նույնիսկ Չելսին վաճառելու նրա ծրագրերը: 12 միլիարդ դոլար կարողություն ունեցող Աբրամովիչը հետևողականորեն հերքում է Պուտինի կամ Կրեմլի հետ ցանկացած կապի առկայությունը, բայց առայժմ դա նրան չի փրկում:

Վերադառնանք Ալիշեր Ուսմանովին, որն, ըստ Forbes-ի, 17 միլիարդ դոլար կարողություն ունի: Արևմտյան մամուլն Ուսմանովին անվանում է Պուտինի ամենասիրելի օլիգարխը, Եվրամիությունը նրան բնութագրում է որպես «գործարար-պաշտոնյա», ամերիկացիներն ասում են, որ Ուսմանովը լուծում է Պուտինի բիզնեսի հետ կապված բոլոր խնդիրները: Այս շարքից հետո առնվազն հստակ է, որ Ուսմանովն արևմուտքի կողմից ամենաշատը թիրախավորված օլիգարխներից է:

Կա նաև կարծիք, թե ռուս որոշ միլիարդատերեր իրավաբանների, ամբողջ աշխարհում գործընկերների և ապահով պայմանների շնորհիվ կարողանում են խուսափել պատժամիջոցների ծանր հետևանքներից: Որոշներն էլ իրենց զբոսանավերն ուղարկել են Մալդիվներ և Մոնտենեգրո՝ տհաճ անակնկալներից խուսափելու համար:

Կան նաև գործարարներ, որոնք ուղիղ տեքստով ասում են, որ պատերազմը խնդրի լուծում չէ և քննադատում են իշխանությանը: 29 միլիարդ դոլար կարողություն ունեցող և Ռուսաստանի ամենահարուստ մարդը համարվող Ալեքսեյ Մորդաշովը, օրինակ, Պուտինին կոչ է արել դադարեցնել արյուրնահեղությունը: Որոշ գործարարներ նաև ֆինանսական աջակցություն են տրամադրում ուկրաինացիներին և պատերազմի հետևանքով տուժածներին: Լինում են նաև դեպքեր, որ պատերազմը քննադատելու և խաղաղության կոչերի համար մարդիկ զրկվում են ոչ միայն գումարից, այլև պաշտոնից: Նախկին փոխվարչապետ, ՖԻԴԵ-ի նախագահ, «Սկոլկովո»-ի նախագահ Արկադի Դվորկովիչն իշխող «Միասնական Ռուսաստան» կուսակցության առաջարկով ազատվել է «Սկոլկովո» հիմնադրամի նախագահի պաշտոնից:

 Ամենաընթերցվողը բաժնում
Էրդողանը սկսել է մեծ առևտուրն ԱՄՆ և ՌԴ միջև
Իրանական ԱԹՍ-ների չբացահայտված պոտենցիալը
Ինչ է հայտնի կապիկի ծաղկի դեպքերի աճի մասին
 Ուշադրության կենտրոնում
ՌԴ Պետդումայում կքննարկեն ռուսերենին տիրապետողներին հայրենակից ճանաչելու օրինագիծը

ՌԴ Պետդումայում կքննարկեն ռուսերենին տիրապետողներին հայրենակից ճանաչելու օրինագիծը Օրինագծով նաև նախատեսվում է հստակեցնել այն ժողովուրդների ցանկը, որոնք պատմականորեն ապրել են Ռուսաստանի տարածքում

 Բաժնի այլ նյութերը
Ռուսաստան-Իսրայել դիվանագիտական սկանդալ Ինչո՞ւ Լավրովը խոսեց Հիտլերի՝ հրեական արյուն ունենալու մասին
---