Ինչպես հայտարարել է Երեւանում Իրանի ԱԳ նախարար Մանուչեհր Մոթթաքին, Հայաստանը եւ Ադրբեջանը բարեկամական երկրներ են Իրանի համար, եւ Իրանը, որպես բարեկամական երկիր ցանկանում է, որպեսզի տարածաշրջանում խաղաղություն եւ կայունություն հաստատվի: «Մենք բոլորս լավ ենք հիշում Վրաստանում տեղի ունեցած 2008 թ-ի իրադարձությունները: Նման բաներ չպետք է այլեւս կատարվեն, քանի որ նրանք ազդեցին տարածաշրջանի անվտանգության, էներգետիկ եւ տրանսպորտային ենթակառուցվածքների վրա», - ասել է Իրանի ԱԳ նախարարը: Նրա խոսքերով, Իրանը կողմ է ղարաբաղյան խնդրի խաղաղ եւ դիվանագիտական լուծմանը: «Ղարաբաղյան հակամարտության կարգավորման հարցերը մեր քննարկումների մասն են կազմում Հայաստանի իշխանությունների հետ: Իրանը պատրաստ է այդ հարցում աջակցել Երեւանին եւ Բաքվին», - ասել է Մանուչեհր Մոթթաքին:
Դժբախտաբար, իր միջուկային ծրագրի պատճառով վտարանդի երկրի իրավիճակում հայտնված Թեհրանը ներկա ժամանակ չի կարող որեւէ կերպ ազդել այն գործընթացների վրա, որոնց մասնակցում են ԱՄՆ-ն եւ ԵՄ-ն: Եվ եթե Իրանը կարող է պայմանավորվել Եվրոպայի եւ Ռուսաստանի հետ, ապա Վաշինգտոնի հետ դա դեռ չի ստացվում: Ամենից հեշտ է մեղադրել Իսրայելին երկխոսության բացակայության մեջ, ինչպես դա փորձում են ներկայացնել պարսիկները ինչպես պետական, այնպես էլ փորձագիտական մակարդակով: Բանն նույնիսկ հրեական լոբբիի ամենազորության մեջ չէ, որը պաշտոնական Թեհրանի կարծիքով, ամեն կերպ խանգարում է իրանական միջուկային ծրագրի իրականացմանը: Իհարկե, կարելի է հասկանալ հրեաների դիրքորոշումը. Մահմուդ Ահմադինեժադի մշտական սպառնալիքներն Իսրայելի հասցեին քչերին կարող են մոլորեցնել: Ի վերջո կողմերի մոտ համբերության բաժակը կարող է լցվել, եւ արդյունքում մենք կստանանք լայնածավալ տարածաշրջանային պատերազմ, որում ինչպես միշտ չի լինի հաղթող, այլ միայն պարտվածներ: Տվյալ դեպքում Իրանի համար զսպող գործոն կարող է լինել իր ձգտումը դառնալ տարածաշրջանային տերություն, առանց արյունահեղության: Սակայն եթե Թուրքիան սկսի իրականացնել Հայ-թուրքական արձանագրությունները, ապա դա կարող է հարված հասցնել Իրանի ռազմավարական ծրագրերին: Գուցե եւ ոչ, տվյալ դեպքում ամեն ինչ կախված է տարածաշրջանի մնացած երկրներից, մասնավորապես Հայաստանից եւ Ադրբեջանից:
Իսկ ինչ վերաբերվում է հայ-իրանական կապերին, ապա նրանք ընդհանուր առմամբ բավականին հաջող են զարգանում: Երկու երկրների համար կարեւոր է Էներգետիկայի ոլորտում ծրագրերի իրականացումը, մասնավորապես Արաքս գետի վրա հիդրոէլեկտրակայանի, Իրան-Հայաստան երկաթուղու եւ նավթամուղի կառուցումը: ՀՀ էներգետիկայի նախարար Արմեն Մովսիսյանի խոսքերով, այդ օբյեկտների կառուցումը ռազմավարապես կարեւոր նախագծեր են: Նրա խոսքերով, ավարտվել են Մեղրիում ՀԷԿ-ի կառուցման տեխնիկատնտեսական հիմնավորման հիմնական աշխատանքները: «Արդեն մշակվել է ֆինանսական եւ կառուցման սխեմայի նախնական փաստաթուղթը: Երկու ամիսների ընթացքում հաստատման համար պետք է ներկայացվեն վերջնական որոշումները», - ասել է Մովսիսյանը: Ինչ վերաբերվում է Հայաստան-Իրան նավթամուղի եւ տերմինալի կառուցմանը, նախարարը նշել է, որ արդեն ավարտվել են տեխնիկական սխեմայի մշակման աշխատանքները:
Հայաստան-Իրան երկաթուղու կառուցման մասով, կողմերը որոշել են տեխնիկատնտեսական եւ ֆինանսական հարցերը լուծելուց հետո, միաժամանակ սկսել երկաթուղու կառուցումը` հայկական կողմը Հայաստանի տարածքում, իրանականը` Իրանի: «Ունենալով մեծ փորձ երկաթուղիների կառուցման գործում, Իրանը պատրաստակամություն է հայտնել աջակցել Հայաստանին այդ հարցում: Բացի այդ, նախորդ հանդիպման ընթացքում Իրանը պատրաստակամություն է հայտնել նաեւ ֆինանսավորել երկաթուղու կառուցումը Հայաստանի տարածքում», - ասել է Արմեն Մովսիսյանը:
Իր հերթին, Իրանի ԱԳ նախարար Մանուչեհր Մոթթաքին հայտարարել է, որ այդ երեք ռազմավարական նախագծերի իրականացումը որակապես կփոխի Իրանի եւ Հայաստանի միջեւ հարաբերությունները: «Մենք ուրախ ենք, որ Հայաստանն այդ նախագծերի միջոցով ձեռք կբերի առանցքային դեր տրանսպորտային եւ էներգետիկ հաղորդակցությունների տեսակետից»,-ասել է Իրանի ԱԳ նախարարը: