Վիկ Դարչինյանը պաշտպանեց իր WBA/ IBF վարկածներով տիտղոսները, իսկ Հայաստանում տեղի ունեցավ սնոուբորդի առաջին առաջնությունը

PanARMENIAN.Net - WBA, WIBF եւ WBO վարկածներով գերթեթեւ քաշային կարգում աշխարհի չեմպիոն Սյուզի Կենտիկյանը (Գերմանիա) ապրիլի 24-ին Գերմանիայում մրցելու է գերմանացի բռնցքամարտուհի Նադիա Ռաոյի հետ (WIBA վարկածով տիտղոսակիր):

Կենտիկյանը մարտի 9-ին տեղի ունեցած մամլո ասուլիսի ժամանակ հայտարարել է, որ ցանկանում է հաղթանակի հասնել նոկաուտով: «Անհամբեր սպասում եմ այս մենամարտին: Այս մարտը նման է լինելու երկու կրակների միջեւ պայքարի, եւ ես պետք է ավելի հզոր լինեմ»,- ասել է Կենտիկյանը:

Հայ սիրողական բռնցքամարտիկները մարտի 9-14-ը մասնակցում են Չեխիայում տեղի ունեցող միջազգային մրցաշարին: Այնտեղ հանդես են գալու 6 բռնցքամարտիկներ` Ազատ Հովհաննիսյանը (57 կգ ք/կ), Արա Պուլուզյանը (60 կգ ք/կ), Հրաչիկ Ջավախյանը (64 կգ ք/կ), Արմեն Եփրեմյանը (69 կգ ք/կ), Անդրանիկ Հակոբյանը (75 կգ ք/կ) եւ Ցոլակ Անանիկյանը (91 կգ ք/կ):

Ձյուդո. Մարտի 7-ին «Դինամո» մարզահամալիրում տեղի է ունեցել ձյուդոյի Հայաստանի առաջնություն: Գավաթին մասնակցում էին մոտ 100 ձյուդոիստներ, որոնցից 15-ը կանայք էին:

Հայաստանի ձյուդոյի ֆեդերացիայի սպորտի գծով տնօրեն Հարություն Ամիրխանյանը հայտնեց PanARMENIAN.Net ի թղթակցին, որ տղամարդկանց շարքում գավաթակիրներ են դարձել հետեւյալ ձյուդոիստները. Հովհաննես Դավթյան (60 կգ ք/կ), Տիգրան Վարոսյան (66 կգ ք/կ), Հայկ Համբարձումյան (81 կգ ք/կ), Արմեն Իսպիրյան (90 կգ ք/կ), Հակոբ Առաքելյան (100 կգ ք/կ) եւ Ազատ Աբրահամյան (ք/կ+100):

Ձյուդոյի ֆեդերացիայի նախագահ Ալեքսան Ավետիսյանի խոսքերով Գավաթն անց է կացել Միջազգային ֆեդերացիայի չափորոշիչներին համապատասխան, եւ առաջին անգամ բոլոր մենամարտերը նկարահանվել են տեսախցիկով:

Հայաստանի գավաթի խաղարկությունից հետո մարտի 15-29-ը ձյուդոիստներն Աբովյանում անցկացնելու են ուսումնամարզական հավաք, որտեղ պատրաստվելու են Եվրոպայի առաջնությանը: Առաջնությունը տեղի է ունենալու ապրիլի 21-ին Վիեննայում (Ավստրիա):

Թենիս. Դեվիսի Գավաթ-2010-ի 1/8 եզրափակչում Արգենտինայի հավաքականը հաղթանակ տարավ Շվեդիայի հավաքականի հանդեպ: Այդպիսով, 1/4 եզրափակչում Արգենտինայի ներկայացուցիչները կհանդիպեն Ռուսաստանի հավաքականի հետ: Ինչպես հաղորդում է gotennis.ru-ն, Արգենտինա-Ռուսաստան հանդիպումը կկայանա Մոսկվայում հուլիսի 9-11-ը:

Արգենտինահայ թենիսիստ Դավիթ Նալբանդյանը 1/8 եզրափակչում չորս սեթերում առանց դժվարության 7:5, 6:3, 4:6 եւ 6:4 հաշվով հաղթեց շվեդացի Անդրաս Վինչիգուերրուին:

Հաղթանակից հետո Նալբանդյանը խոստովանեց, որ իրեն կրկին անհանգստացնում էր ոտքի ցավը: «Հանդիպման հենց սկզբից ես ինձ այնքան էլ լավ չէի զգում: Այն բանից հետո, երբ ես հաղթեցի առաջին սեթում, զգացի, որ ոտքս ցավում է, եւ ամեն հաջորդ խաղարկմանը ես գնալով ավելի վատ էի զգում: Բայց ես պարզապես փորձեցի 100%-ով գործի դնել իմ ունակությունները, եւ այսօր դա բավական եղավ: Մենք բոլորս շատ լավ աշխատանք կատարեցինք այս հանգստյան օրերին: Մեր բոլոր մարզիկներն ամենաբարձր մակարդակով խաղացին, եւ ես ցանկանում եմ շնորհավորել նրանց»,- ասաց Նալբանդյանը:

Ծանրամարտ. Ապրիլի 2-11-ը Մինսկում (Բելոռուս) տեղի է ունենալու տղամարդկանց եւ կանանց շարքում Եվրոպայի ծանրամարտի առաջնությունը:

Հայաստանը Եվրոպայի տղամարդկանց առաջնությունում ներկայացնելու են 7 ծանրորդներ: Հայաստանի հավաքականի գլխավոր մարզիչ Աշոտ Մխիթարյանը հայտնել է PanARMENIAN.Net ի թղթակցին, որ առաջնության մեկնարկից առաջ անցկացվել է 4 ուսումնամարզական հավաք. «Այժմ մենք Ծաղկաձորում ենք, իսկ մարտի 18-ին մեկնելու ենք Մինսկ, որտեղ անցկացնելու ենք վերջին հավաքը»,- ասել է Մխիթարյանը:

Առաջնությանը մասնակցելու են հետեւյալ ծանրորդները. Սմբատ Մարգարյան (6 կգ ք/կ), Առաքել Միրզոյան եւ Տիգրան Մարտիրոսյան (երկուսն էլ 77 կգ ք/կ), Էգդար Գեւորգյան եւ Գեւորգ Պողոսյան (երկուսն էլ 85 կգ ք/կ), Արթուր Բաբայան (105 ք/կ) եւ Ռուբեն Ալեքսանյան (ք/կ+105): Կանացից ելույթ են ունենալու Մելինե Դալուզյանը (69 ք/կ) եւ Հռիփսիմե Խուրշուդյանը (75 ք/կ):

Ֆուտբոլ. Մարտի 10-ին ՖՖԱ կենտրոնակայանում տեղի է ունենալու ՖՖԱ Հանձնաժողովի արտոնագրման նիստը, որի նպատակը «ազգային» արտոնագիր ստանալու արժանի թիմերի բացահայտումն էր:

Հանձնաժողովը որոշում կայացրեց, որի համաձայն արտոնագիր ստանալու են բարձրագույն լիգայի 8 ակումբներ` «Փյունիկ», «Միկա», «Ուլիս», «Բանանց», «Գանձասար», «Շիրակ», «Կիլիկիա» եւ «Էրեբունի-Դիլիջան»:

Հայաստանի մինչեւ 17 տարեկանների ֆուտբոլի հավաքականը ժամանել է Իրան, որտեղ կայանալու է Իրանի մինչեւ 17 տարեկանների ֆուտբոլի հավաքականի հետ 2 ընկերական հանդիպում: Հանդիպումները տեղի են ունենալու մարտի 12-ին եւ 14-ին Թեհրանում:

Հովհաննես Գոհարյանը «ԲԱՏԷ» կազմում դարձել է Բելառուսի Սուպերգավաթի հաղթող: Մարտի 8-ին «ԲԱՏԷ»-ն հանդիպել է «Նավթանուի» հետ եւ հաղթել հետխաղային 11 մետրանոցով:

Շախմատ. Մարտի 5-19-ը խորվաթական Ռիեկ քաղաքում տեղի է ունենում Եվրոպայի շախմատի անհատական առաջնությունը տղամարդկանց եւ կանանց շարքում: Հայաստանը ներկայացնում են 17 շախմատիստներ եւ շախմատիստուհիներ: 5 փուլերից հետո ամենաբարձր արդյունքներն ունեն Հրանտ Մելքումյանը, Սամվել Տեր-Սահակյանը, կանանցից` Լիլիթ Գալոյանը: 3-ն էլ առաջատարներից ետ են մնում 0,5 միավորով:

Սնուոբորդ. Մարտի 6-ին Ծաղկաձորում կայացավ Հայաստանի սնոուբորդքրոսի առաջին բաց առաջնությունը: Այն կազմակերպել էին ԱՄՆ դեսպանությունն ու Հայաստանի Օլիմպիական կոմիտեն: Չեմպիոն դարձավ Կարեն Միրզոյանը:

Առաջնությանը ներկա էին Հայաստանում ԱՄՆ դեսպան Մարի Յովանովիչը եւ ՀՀ սպորտի եւ երիտասարդության հարցերով նախարար Արթուր Պետրոսյանը:

Մարի Յովանովիչը նշեց, որ ուրախ է Հայաստանում սնոուբորդի առաջին առաջնության կայացման համար: «Հուսով եմ` դա միայն սկիզբն է, եւ որ սնոուբորդը կզարգանա Հայաստանում: Շնորհակալություն Ամբերին ու Էրինին, ովքեր Յուտայից Հայաստան ժամանեցին որպես «սպորտի դեսպաններ»,- ասաց նա:

Հայաստանում ԱՄՆ դեսպանության եւ ՀՀ Օլիմպիական կոմիտեի հրավերով Հայաստանում էին ԱՄՆ-ից ժամանած սնոուբորդիստուհիներ Ամբեր Սթոքհաուսը եւ Էրին Քոմսթոքը: Նրանք Հայաստան էին ժամանել «Սպորտի դեսպաններ» ծրագրի շրջանակներում եւ իրենց ավանդը ներդրել Հայաստանում սնոուբորդի առաջնության անցկացման գործում: