Հայաստանում քննարկում են լեռնամետալուրգիական արդյունաբերության ոլորտի խնդիրներն ու հեռանկարները

PanARMENIAN.Net - Այսօր ՀՀ նախագահ Սերժ Սարգսյանը մասնակցել է աշխատանքային խորհրդակցությանը ՀՀ լեռնամետալուրգիական արդյունաբերության ոլորտում գործող հիմնական ընկերությունների տնօրենների և սեփականատերերի հետ: Խորհրդակցությանը ներկա էին ՀՀ էկոնոմիկայի նախարար Տիգրան Դավթյանը, Էներգետիկայի եւ բնական պաշարների նախարար Արմեն Մովսիսյանը, ֆինանսների նախարար Վաչե Գաբրիելյանը, ՀՀ ԿԱ Պետեկամուտների կոմիտեի նախագահ Գագիկ Խաչատրյանը: Ներկա էին «Զանգեզուրի պղնձամոլիբդենային կոմբինատ» ՓԲԸ-ի տնօրեն Մաքսիմ Հակոբյանը, «Դինո Գոլդ Մայնինգ քամփընի» ՓԲԸ-ի արտադրության գծով տնօրեն Ռոն Մոբլին, «Արմենիան Քափր Փրոգրամ» ՓԲԸ-ի գործադիր տնօրեն Գագիկ Արզումանյանը և ոլորտի այլ ներկայացուցիչներ:

Խորհրդակցության ընթացքում նշվեց, որ Հայաստանում այսօր հայտնաբերվել են օգտակար հանածոների ավելի քան 480 հանքավայրեր: Հանքարդյունաբերությունը, որը հանդիսանում է Հայաստանի տնտեսության աճի ամենազգալի գրավականներից մեկը, ակնհայտորեն պահպանում է և շարունակելու է պահպանել տնտեսության առաջատարի իր դիրքերը: 2010թ. արդյունքներով հանքագործության մասնաբաժինը ընդհանուր արդյունաբերության կառուցվածքում կազմել է 17,7 տոկոս, որի 96, 5-ը կազմում է մետաղական հանքաքարերի արդյունահանումը: Հանքագործության ու մետաղագործական արտադրության ոլորտներում 2010թ. տվյալներով զբաղված է 10 600 մարդ, որտեղ ստեղծվում է բարձր ավելացված արժեք, ապահովվում է աշխատակիցների բարձր աշխատավարձ՝ միջինը 130 000 դրամ: