Չինաստանի և ԱՄՆ-ի ՏՏ ոլորտի խոշոր ընկերությունները հետաքրքրված են հայկական շուկայով

PanARMENIAN.Net - Հայաստանի վարչապետի հանդիպմանը «Plug and Play» համակարգչային ձեռնարկությունների ինկուբատորի տնօրենի հետ կարևորվեց Հայաստանում «Plug and Play»-ի ներկայացուցչություն, ինչպես նաև ԱՄՆ-ի Սիլիկոնյան հովտում ՀՀ ներկայացուցչություն բացելու հարցը, ինչը պետք է նպաստի հայ-ամերիկյան համագործակցության զարգացմանը ՏՏ ոլորտում և լայն հնարավորություններ ստեղծի ներդրումների, ինչպես նաև հայկական ապրանքի իրացման համար: «Plug and Play» ընկերության տնօրենը նշել է նաև, որ անհրաժեշտ է խորացնել համագործակցությունը կրթության ոլորտում, մասնավորապես, հարթակ ստեղծելով Սթենֆորդի համալսարանի ուսանողների հետ փոխանակման ծրագրերի համար:

Ըստ ՀՀ Ազգային վիճակագրական ծառայության տվյալների, Հայաստանում 364 համակարգիչ է արտադրվել 2010 թվականի հունվար-մարտ ամիսներին: Անցյալ տարվա նույն ժամանակահատվածի համեմատ, համակարգիչների արտադրությունը կրճատվել է 11,7 տոկոսով:

Կառավարության որոշումը ISO/IEC 27000 միջազգային ստանդարտները տեղայնացնելու և որպես ազգային ստանդարտ ընդունելու մասին Հայաստանի տեղեկատվական անվտանգության ոլորտում պատմության նոր էջ է բացում: Նման կարծիք է հայտնել Ապագա Թեքնոլոջիսի տնօրեն Միշել Դավուդյանը տեղեկատվական անվտանգության կառավարման համակարգերի ISO 27000 ստանդարտների և հավաստագրման մասին սեմինարի ընթացքում, որը տեղի ունեցավ Երևանում ապրիլի 27-ին: Սեմինարին մասնակցել են բանկերի և ֆինանսական ոլորտի ընկերությունների ղեկավարներ ու ՏՏ բաժինների պատասխանատուներ:

Հայաստանի իրավապահ մարմինների աշխատակիցները համակարգչային վերապատրաստման դասընթացների կմասնակցեն դատախազության «Համակարգչային վերապատրաստման կենտրոնում»: Կենտրոնի ստեղծումն իրականացվել է ՄԱԶԾ «Թրաֆիքինգի դեմ պայքարի ծրագիր. օժանդակություն կարողությունների զարգացմանը և աջակցություն տուժածներին» ծրագրի շրջանակներում, որի հիմնադրման համար ընտրվել է ՀՀ դատախազության դպրոցը: Կենտրոնը հագեցած է մի շարք կրթական ծրագրերով հարուստ ամփոփ փաթեթով, որը օգտակար է թմրանյութերի և մարդկանց թրաֆիքինգի, փողերի լվացման ու անդրազգային այլ հանցավորությունների դեմ պայքարում մասնագիտական աջակցություն ցուցաբերելու համար: Դատախազության համակարգը հագեցած է միասնական համակարգչային համակարգով, ինչը հնարավորություն կտա դատախազներին տեղում անցնել վերապատրաստումը:

Տեղեկատվական տեխնոլոգիաների BarCamp խորհրդաժողովը տեղի կունենա մայիսի 21-23 Երևանում: BarCamp-ը հնարավորություն է տալիս ՏՏ ոլորտի պրոֆեսիոնալներին և հարակից ոլորտների ներկայացուցիչներին` լրագրողներին, դիզայներներին, բլոգերներին գաղափարներ փոխանակել ոչ պաշտոնական մթնոլորտում: BarCamp ճամբարն արդեն երկրորդ անգամ կանցնի Երևանում: Անցյալ տարի ճամբարին մասնակցեց շուրջ 450 մարդ Հայաստանից, Վրաստանից, ՌԴ-ից, Իրանից, ԱՄՆ-ից և այլ երկրներից:

Իսկ մայիսի 28-ին Երևանում կբացվի ArmRobotics ռոբոտների առաջնությունը: «Ական փնտրող ռոբոտ» մրցույթին կմասնակցեն 15 երիտասարդական թիմեր Հայաստանից և Իրանի հայկական համայնքի ներկայացուցիչները: Ըստ նրա, ArmRobotics-ի հերթական առաջնության թեման առաջարկել է բրիտանական բարեգործական և ամերիկյան ոչ առևտրային The HALO Trust կազմակերպությունը, որը զբաղվում է ականազերծմամբ և չպայթած ռազմամթերքի վնասազերծմամբ: Միջոցառման ընթացքում ռոբոտները պետք է հայտնաբերեն հողի տակ գտնվող ականներն ու WiFi-ի, ռադիոհաղորդիչի կամ ֆլեշ-կրիչի միջոցով սերվերին ուղարկեն ականների քարտեզը: ArmRobotics առաջնությունն, որի կազմակերպիչն է Տեղեկատվական տեխնոլոգիաների ընկերությունների միությունը, առաջին անգամ անց է կացվել Հայաստանում 2008 թվականին:

Google հանրահայտ որոնման համակարգը 35 լեզվով վիրտուալ ստեղնաշար է գործարկել, այդ թվում նաև հայերեն` որոնման տեղի կողքին: Ինչպես ասվում է Google-ի պաշտոնական բլոգի գրության մեջ, նորամուծությունն օգտվողներին թույլ կտա մայրենի լեզվով իրականացնել որոնումը, անկախ այն բանից, թե որտեղ են գտնվում և ինչ տառատեսակից են օգտվում: Մինչդեռ, Odnoklassniki.ru ռուսական սոցիալական ցանցի բջջային տարբերակը ևս հասանելի է հայերեն լեզվով, թեև միայն բջջային հեռախոսների սահմանափակ մոդելներն են ճանաչում հայերեն տառերը, այդ թվում iPhone, HTC Android սմարթֆոնները, ինչպես նաև Windows mobile և Symbian (սկսած 7-րդ տարբերակից) օպերացիոնալ համակարգերով հագեցած բջջային հեռախոսները: Հայկական ինտերնետ-օգտագործողների բաժինը կազմում է Odnoklasniki.ru կայքի տրաֆիկի 1,5 տոկոսը: Մեկ շաբաթվա ընթացքում կայք այցելում է մոտ 200 000 մարդ: Հայաստանում ընդհանուր օգտագործողների թիվը կազմում է ավելի քան 300 000 մարդ: Facebook ամերիկյան սոցիալական ցանցը տեղայնացված է հայերենով 85 տոկոսով:

ՎիվաՍել-ՄՏՍ ընկերության գլխավոր տնօրենն ու Հայաստանի յոթ բուհերի ռեկտորներ Համագործակցության մասին հուշագիր են ստորագրել, որի շրջանակներում կկազմակերպվի ուսանողների պրակտիկա, մասնագիտական դասախոսություններ կկազմակերպվեն ՎիվաՍել-ՄՏՍ-ի աշխատակիցների կողմից, համատեղ ծրագրեր ու գիտահետազոտական աշխատանքներ, ընկերությունների աշխատակիցները կաջակցեն ուսանողներին հետազոտական, դիպլոմային ու մագիստրոսական աշխատանքներում: Հուշագիրը ստորագրել են Մոսկվայի էկոնոմիկայի, վիճակագրության և տեղեկատվության ինստիտուտի Երևանի բաժանմունքը, Վանաձորի պետական մանկավարժական համալսարանը, Էկոնոմիկայի ու կառավարման համալսարանը, Վարդենիսի Վիկտոր Համբարձումյանի անվան համալսարանը, «Անանիա Շիրակացի» համալսարանը, «Եվրասիա» միջազգային համալսարանը, «Գլաձոր» համալսարանը: Ուսանողները հնարավորություն կստանան խորանալ այնպիսի ոլորտների մեջ, ինչպիսիք են իրավագիտությունը, հաշվապահական հաշվառումը, մարքեթինգն ու վաճառքը, ՏՏ ոլորտը, բաժանորդների սպասարկումը: Միևնույն ժամանակ, ՎիվաՍել-ՄՏՍ-ում պրակտիկա անցնող ուսանողները աշխատավարձ կստանան: