Ռուսաստանի երեք խոշորագույն բջջային օպերատորներից մեկը` MegaFon-ն առայժմ չի մտածել Orange Արմենիա բջջային օպերատորի բաժնետոմսերի ձեռքբերման մասին: Այս մասին մարտի 30-ին Orange Արմենիայի գլխավոր տնօրեն Բրունո Դյութուայի հետ տված համատեղ մամուլի ասուլիսին հայտարարել է MegaFon-ի կորպորատիվ հաղորդագրության բաժնի ղեկավար Կարեն Ասոյանը:
Ըստ նրա, Orange Արմենիա ընկերության հետ ռուսական օպերատորը համագործակցում է առայժմ միայն ռոմինգի հարցում: «Հետո կտեսնենք, սա համագործակցության առաջին քայլն է»,-ընդգծել է նա:
MegaFon-ի ղեկավարության կողմից ավելի վաղ հայտարարություն էր արվել այն մասին, որ ընկերությունը հետաքրքրվում է Հայաստանի, Ղրղզստանի և Ուզբեկստանի շուկաներով:
Մարտի 30-ին Orange Արմենիա օպերատորը և Ռուսաստանի 3 խոշոր բջջային օպերատորներից մեկը` MegaFon-ը հայտարարեցին ռազմավարական համագործակցության մասին, որի շնորհիվ հայ օպերատորի բաժանորդները, գտնվելով Ռուսատանում, կկարողանան օգտվել ռոմինգ-ծառայության աննախադեպ սակագներից:
